चितवन, भदौं ६ । चितवनमा आज फेरि थप १३ जनामा कोरोना भाइरस (कोभिड-१९) संक्रमण पुष्टि भएको छ । चितवन मेडिकल कलेजको कोभिड ल्याबमा गरिएको परीक्षणमा चितवनका ४ जना र मकवानपुरका ९ जनासहित १३ जनामा संक्रमण पुष्टि भएको छ ।
चितवनका संक्रमण पुष्टि हुनेमा भरतपुर महानगरपालिका-१ का ४८ वर्षीय पुरुष १ जना, भरतपुर-८ का २७ वर्षीया महिला १ जना, भरतपुर-२३ का ६१ वर्षीय पुरुष १ जना र खैहरनी नगरपालिका-१२ का ३६ वर्षीय पुरुष १ जना रहेका छन् । यस्तै मकवानपुरको हेटौंडा-६ का ४ जना महिला र १ जना पुरुष गरी ५ जना, हेटौंडा-४ का ५६ वर्षीय पुरुष १ जना , मनहरीका ६० वर्षीया महिला १ जना र लामसूर्य-९ का ३० र ६० वर्षीय पुरुषहरु २ जनामा कोरोना संक्रमण देखिएको छ ।
भदौं ४ गते गरिएको परीक्षणमा उनीहरुको नतिजा पोजिटिभ आएको हो । नयाँ ल्याबबाट परीक्षण गरिएकाले यी सबै पोजिटिभ पुष्टि भएका नमुनालाई पुनः एकपटक भरतपुर अस्पतालको कोभिड-१९ प्रयोगशालामा परीक्षण गरिएको थियो ।
नतिजा एउटै आएपछि चितवन मेडिकल कलेज आज औपचारिक रुपमा रिपोर्ट सार्वजनिक गरेको हो । भदौं ४ गते कुल १३६ वटा नमुना परीक्षण गरिएकोमा १३ वटा पोजिटिभ र १२३ नमुनाको रिपोर्ट नेगेटिभ आएको अस्पतालले जनाएको छ ।
चितवनको भरतपुर अस्पताल कोभिड-१९ प्रयोगशालामा गरिएको परीक्षणमा आज बिहान चितवनका २० जनासहित ३३ जनामा कोरोना संक्रमण पुष्टि भएको प्रयोगशालाकी प्रमुख डा. नितु अधिकारीले जानकारी दिएकी थिइन् ।
भरतपुर अस्पताल कोभिड-१९ प्रयोगशालामा भदौ ५ गते प्राप्त भएका नमुनामघ्ये २७० वटा नमुनाहरुको पिसिआर परीक्षणको क्रममा ३३ वटा नमुनाको नतिजा पोजेटिभ र २३७ वटा नमुनाको नतिजा नेगेटिभ रहेको भरतपुर अस्पतालले जानकारी दिएको छ ।
भरतपुर अस्पताल कोभिड–१९ प्रयोगशालामा शुक्रबार गरिएको परीक्षणमा चितवनको भरतपुर, रत्ननगर र राप्तीका गरी २० जना र पूर्वी नवलपरासी, मकवानपुर, बारा, रौतहट, पर्सा, र मकवानपुरका गरी १३ जनामा कोरोना संक्रमण पुष्टि भएको प्रयोगशालाकी प्रमुख डा.नितु अधिकारीले जानकारी दिएकी थिइन्।
यो पनि पढ्नुहोस्
