२२ पुस, काठमाण्डौ । प्रधानमन्त्री शेरबहादुर देउवाले आंशिक प्राध्यापकको करार नियुक्ति जबर्जस्ती अगाडि बढाउन निर्देशन दिएपनि अर्थ मन्त्रालयले रोकिदिएको छ । प्रधानमन्त्री देउवाले प्रतिनिधि तथा प्रदेश सभा चुनावअघि १ हजार ४२० आंशिक प्राध्यापकलाई करारमा नियुक्ति दिन त्रिभुवन विश्वविद्यालयका पदाधिकारीहरुलाई निर्देशन दिएका थिए । देउवाले १८ मंसिरमा करार नियुक्ति प्रक्रिया खोल्नेसम्बन्धि प्रस्ताव मन्त्रिपरिषद्बाट पारित गराएका थिए ।
देउवाले निर्देशन दिएपनि अर्थ मन्त्रालयले बजेट उपलब्ध नभएको कारण बताएर नियुक्ति प्रक्रिया रोकिदिएको हो । विश्वविद्यालय अनुदान आयोगमार्फत् मात्र बजेट निकासा दिन सकिने अर्थ मन्त्रालयका अधिकारीहरुको अडान छ ।
अर्थले बजेट निकासा नदिएसम्म करार नियुक्तिको प्रक्रिया अगाडि बढ्दैन । ‘प्रधानमन्त्रीले निर्देशन दिएर मात्र हँुदैन । शिक्षा मन्त्रालयको सिफारिसमा अर्थले अनुदान आयोगमार्फत् बजेट निकासा गरी स्पष्ट निर्देशन दिएपछि मात्र प्रक्रिया अगाडि बढ्छ,’ त्रिविका रजिस्ट्रार डिल्लीराम उप्रेतीले भने ‘त्यो नहुँदासम्म हामीले मात्र चाहेर केही हुँदैन ।’
