काठमाडौँ । सरकारले सार्वजनिक सवारी साधनको गाडी भाडा घटाउने निर्णय गरेको छ । यातायात व्यवस्था विभागले इन्धनको मूल्य घटेसँगै अन्तरप्रदेश चल्ने सार्वजनिक सवारी साधनको भाडा घटाएको हो ।
नेपाल आयल निगमले हिजो बिहिबार राती १२ बजेदेखि लागू हुने गरी पेट्रोलियम पदार्थको मूल्यमा लिटरमा रु १० को दरले घटाएसँगै विभागले पनि अन्तरप्रदेश चल्ने सार्वजनिक सवारी साधनको भाडा घटाएको हो ।
प्रमुख प्रतिपक्षी दल नेकपा एमालेले प्रतिनिधिसभा जरुरी सार्वजनिक महत्त्वको प्रस्ताव दर्ता गराएपछि बाध्य भएर सरकारको निर्देशनमा
नेपाल आयल निगमले पेट्रोलियम पदार्थको मूल्य घटाएको थियो । पेट्रोलियम पदार्थको मूल्य बढेपछि सरकारको चौतर्फी बिरोध भएको थियो ।
भाडा घटेसँगै यात्रुबाहक सवारीमा २ प्रतिशत, पहाडी बाटोमा सञ्चालन हुने मालबाहक सवारीमा २.६ प्रतिशत र तराईको बाटोमा सञ्चालन हुने मालवाहक सवारीमा २.९ प्रतिशत घटेको विभागले जनाएको छ ।
यातायात व्यवस्था विभागको विसं २०७८ चैत १७ को निर्णयअनुसार लागू गरिएकोमा पछिल्लो पटक भाडा समायोजन गर्दा आधार लिएको डिजेलको बजार मूल्य रु १६३ प्रति लिटरलाई आधार मान्दै आए पनि बिहिबार रातीदेखि प्रतिलिटर रु १० घटी रु १५३ कायम भएकाले सोहीअनुसार सवारी भाडा घटाएको हो ।
सरकारले सार्वजनिक सवारी साधनको भाडादर स्वचालित आधारमा गर्ने व्यवस्थाअनुसार भाडादर घटेको विभागले जनाएको छ । नेपाल यातायात व्यवसायी राष्ट्रिय महासङ्घका वरिष्ठ उपाध्यक्ष सरोज सिटौलाले स्वचालित भाडादरले व्यवसायी र यात्रु दुवैलाई मर्का नपर्ने बताए । उनले घटेको भाडा लिन सम्पूर्ण यातायात व्यवसायी, चालक तथा सहचालकलाई आग्रहसमेत गरेका छन् ।
हेर्नुहोस् नयाँ भाडादर कुन रुटको अव कति लाग्छ ?
