युवती बलात्कार आरोपित कन्सल्टेन्सी सञ्चालक मनोज पाण्डे पक्राउ Nepalpatra युवती बलात्कार आरोपित कन्सल्टेन्सी सञ्चालक मनोज पाण्डे पक्राउ
१४ असार २०७९, मंगलबार

युवती बलात्कार आरोपित कन्सल्टेन्सी सञ्चालक मनोज पाण्डे पक्राउ


मनोज पाण्डे

काठमाडौँ । एक युवतीलाई बलात्कार गरेको आरोप लागेका मोडल ग्लोबल भिसाज कन्सल्टेन्सीका सञ्चालक मनोज पाण्डेलाई प्रहरीले पक्राउ गरेको छ । सौन्दर्य प्रतियोगिताको नाममा बलात्कार गरेको अभियोगमा पाण्डेलाई उपत्यका अपराध अनुसन्धान कार्यालयले काठमाडौँको स्वयम्भूबाट पक्राउ गरेको हो ।

करिब ८ वर्षअघि १६ वर्षको उमेरमा मिस ग्लोबल इन्टरनेसनलमा भाग लिएकी युवतीलाई बलात्कार गरेको आरोप लागेको छ । सो प्रतियोगिता सकिएपछि पाण्डेले ‘सक्सेस पार्टी’ का लागि भन्दै बानेश्वरको एभरेष्ट होटलमा बोलाएर बलात्कार गरेको पीडित युवतीको भनाइ रहेको छ ।

मिस ग्लोबल इन्टरनेसनल-२०१४ मा सहभागी पिडित मोडलले आफूलाई बेहोस हुने औषधी मिसाइएको पेय पदार्थ खुवाएर बलात्कार गरेको भनेर सामाजिक सञ्जालबाट केही दिनअघि भिडियो सार्वजनिक गरेकी थिइन् ।

टिकटक युजर आईडी ‘सुसी खान जाने हो’ बाट बुधवार साँझ पीडित युवतीलेआफू बलात्कृत भएको आरोप लगाएर भाग-१ देखी भाग-२० सम्मका भिडियोहरु पोष्ट गर्दै कारवाहीको माग गरेपछि सामाजिक सञ्जालमा ती भिडियोहरु भाइरल भइरहेका छन् ।

सामाजिक सञ्जालमा महिला हिंसा भएको भनी प्रकाशित भिडियोबारे अध्ययन गर्न बनेको छानविन समितिलाई सहयोग गर्न गृह मन्त्रालयले सबैमा अनुरोध गरेको छ । मन्त्रालयले आज एक विज्ञप्ति जारी गरी यस्ता विषयमा सीघ्र छानविनमार्फत सत्यतथ्य पत्ता लगाई दोषीलाई हदैसम्मको कारवाही गर्न नेपाल सरकार प्रतिबद्ध रहेको स्पष्ट पारेको छ ।

प्रहरीले शुक्रबार गठन गरेको उक्त छानविन समितिमा प्रहरी उपरीक्षक कृष्ण कोइराला, प्रहरी नायब उपरीक्षक कोपिला चुडाल, प्रहरी नायब उपरीक्षक हरि बस्नेत र प्रहरी निरीक्षक सपना खड्का रहेका छन् । समितिले शुक्रबारबाटै काम सुरु गरेको गृह मन्त्रालयले जनाएको छ ।

मन्त्रालयले उक्त सामग्रीका सन्दर्भमा बिहीबार प्रतिनिधिसभा बैठकमा सांसदबाट उठाइएको र सभामुखले रुलिङ गरेको तथा नागरिक समाजबाट कारवाहीका लागि प्रदर्शन एवं दबाबका सम्बन्धमा गृहमन्त्रालयको गम्भीर ध्यानाकर्षण भएको जनाएको छ ।

यो पनि पढ्नुहोस्

८ वर्षअघि १६ वर्षको उमेरमा बलात्कृत युवतीको घरमा पुग्यो प्रहरी टोली


यो समाचार पढेर तपाईको प्रतिक्रिया के छ ?

प्रतिक्रिया दिनुहोस !