शोभा काफ्ले खतिवडा 
कैयौँ वीरहरुको रगतले बनेको; सुन्दर देश हो यो मेरो;
कहाँ देख्न पाइन्छ जहाँ-तहाँ जलको यस्तो पँधेरो !१
जस्तो जीवन जस्लाई चाहिन्छ; खोज्दा नेपालमै पाइन्छ !
नपत्याए तिमी आफै खोजेर हेर; जगत सारा यहीँ भेटिन्छ !!२
कतै छिन्न भिन्न यसै नहोस है यो मेरो राज्य !
मेरो त्यो हिमचुली झैँ उज्यालो बनोस है यो साम्राज्य !!३
कर्णाली र मेचीसम्म नै कतै पनि देशमा भेदभाव अव नहोस !
सन्तानको जस्तो यो देशको पनि मोह हरेक भु-भागमा बढोस् !!४
हिमवत यो खण्ड मेरो रहोस है सँधा दिन अखण्ड !
मेटिएर जाओस हाम्रा मनका विद्रोह अनि पाखण्ड !!५
जन्मभूमिले एउटा मात्रै असल सन्तान खोजेकी छन् !
हाम्रो सुन्दर देश बचाउनलाई पो आव्हान गरेकी छन !!६
धीर पनि अति होस र ऊ गम्भिर पनि साँच्चै देखियोस !
कसैले हतास यदि पारे भने पनि; कहिले कतै हतास नबनोस !!७
यो विश्वमा कतै र कहीँ पनि छैन यस्तो कुनै पनि राज्य !
हे वीर सन्तान यो देशलाई पनि बनाइदेउन एक साम्राज्य !!८
के छैन यो भूमिमा तिमी आफैँ खोतलेर हेर्ने त गर !
अपार जलमा नै महाशक्ति घोली पठाएकी छु है कति धेर !!९
एउटै वीर सन्तान मेरो जतन गर्ने; मलाई चाहिएको छ !
यो जगतकै श्रेष्ठ भूमि हो भनेर भन्न मलाई कस्तो मन छ !!१०
तीनकोटी बहादुरको यो देश हो है नेपाल खण्ड !
तीनै कोटी सन्तानहरु मिलेर बनाउन है यसलाई अखण्ड !!११
देशका सिंजा, मेची, काली र कुना काप्चा पनि अव हाँसुन;
झुपडीमा दरवारको सुखको आभास सबैले पो पाउँन् !!१२
भोको नहोस बालकको पेट बुढा बुढी सुक्खले बाँचुन !
झुपडी र महलको भेदभाव अव कसैले कहिले नगरुन् !!१३
सवैलाई शुभ र चेतनाको एक उज्वल भविश्य दिने !
देशका हरेक युवाको चाहनालाई दीप जस्तै बाल्ने !!१४
एउटा मानिस चाहिएको छ यो देशलाई सँधै बचाउने !
उन्नति र विकास गरेर यहाँ समृद्दिको शिखर चढाउने !!१५
देशको धर्म कला र संस्कृति; आफैँ पढ्ने र ज्ञानले बुझ्ने !
यसकोधर्म,मर्म,गुह्य,रहस्यमय संस्कृतिलाई बचाउँने !१६
अरुले आई शिर आफ्नो जहाँ कति श्रद्दाले झुकाउँछन् !
त्यस्तो पावन यो भूमिलाई हामी आफैँ कहिले चिन्छौँ ?१७
तीनकोटी वीरहरुकी आमा हुँ म त फगत एउटी !
मेरा सन्तान बहादुर बनेर अव बसिदेऊ देशको धरौटी !!१८
अव मलाई मेरो यो देशको विकास धेरै चाहिएको छ !
मेरो मान इज्जत जोगाउने सन्तान पनि चाहिएको छ !!१९
अविचलित घीर अनि गम्भिर, ज्ञानी होस त्यो सन्तान !!
देशको हितमा प्राण त्याग्ने सहिद झैँ होस त्यो सन्तान !!२०
देश बुझोस्, महिमा बुझोस् यस्को प्राचीनता पनि बुझोस् !
विचलित नहोस,हरेस नखाओस मात्र यो देश बचाओस् अनि यो देश सुन्दर बनाओस !!२१
यो देश बुद्दको हो तिमी बुद्द नै पनि त बनि दिनु !
देशको नै हितका खातिर तिमी सत्ताको मोह त्यगि दिनु !!२२
*शोभा काफ्ले खतिवडा लेखक, साहित्यकार, सामाजिक अभियन्ता हुनुहुन्छ ।
