पृष्ठभूमि : विश्वप्रसिद्ध अन्नपूर्ण पदमार्गको थोरङला पास पुग्दाको अनुभव रोमाञ्चक हुने गर्छ । समुद्री सतहबाट ५४१६ मिटर उचाइमा रहेको थोरङला पास पार गर्न विश्वभरबाट बर्षेनी हजारौं पर्यटकहरु नेपाल आउँछन् ।
परिचय
देशी विदेशी सबैको रोजाइमा परेको मनाङ जिल्लाको मनाङ ङिस्याङ गाउँपालिकामा पर्ने थोरङला पास ५४१६ मिटर उचाइ रहेको छ । पदयात्राका सौखिनका लागि जीवनको प्रतिष्ठा समेत बन्ने गरेको ५४१६ मिटरको थोराङ भञ्ज्याङलाई पार गर्दा आन्तरिक तथा बाह्य पर्यटक आफूलाई भाग्यमानी ठान्छन् । अन्नपूर्ण पदमार्ग विश्वका १० उत्कृष्ट गन्तव्यमध्ये एक मानिन्छ ।
पर्यटकीय महत्व
थोराङ्ला चढ्न पर्यटक विशेष रुची राख्छन् । यहाँ पुगेपछि पर्यटक प्रकृति देखेर खुसीका आँसु झार्छन् । भञ्ज्याङ चढ्न सफल भएकोमा साथीभाइसँग खुसी साटासाट गर्छन् । हिउँ पग्लिएर बनेको पहाड हेरेर पर्यटक लोभिन्छन् । हिमाल हेरेपछि दंग पर्छन् । वातावरण, रहनसहन, हिमाली हावाको सुगन्ध र एकान्तले उनीहरु प्रकृतिमा हराउँछन् । कोही थोराङ चढ्छन् । पर्यटकहरु जीवन र प्रकृतिलाई बुझ्छन् र फर्कन्छन् ।
प्राकृतिक सौन्दर्य
थोरङला पास पुग्ने जो कोहिले पनि वरिपरि सेताम्ये हिमाल हेर्दा धर्तीको स्वर्ग झैँ महसुस गर्न सक्छन् । थोरङला पासबाट पूरै ३६० डिग्रीको हिमाल देख्न सकिन्छ । भौगोलिक कठिनाई भएतापनि प्राकृतिक मनोरमले यहाँ आउने आन्तरिक तथा बाह्य पर्यटकको मन प्रफुल्ल बनाउँछ । पदमार्गलाई मोटर बाटोले छोटो बनाएको भएपनि पर्यटक भने पहिलेको तुलनामा बढेका छन् । पर्यटकलाई सहज र सुविधाजनक यात्रा गर्न र गराउन अशक्तका लागि घोडाको व्यवस्था समेत गरिएको छ ।
जैविक विविधता
थोराङ्ला फेदमा ब्लु शीप (जंगली भेडा) हेर्न पाइन्छ । नार र फूमा कस्तुरी र नाउर भेटिन्छन् । जडीबुटी, फूल र जैविक विविधतामा पनि मनाङ धनी छ । धेरैले प्रकृति, जनजीवन र रहनसहनलाई शोध र अनुसन्धानको विषय बनाएका छन् ।
आकर्षणहरू
थोरङला यात्राको शुरुवात टंकी मनाङ, याकखर्क,लेदर, थोरङ फेदी र हाईक्यम्प यस क्षेत्रमा पर्ने महत्वपूर्ण ठाउँ हुन् ।
समस्याहरु
हाल पर्यटकलाई सहज होस भनी निर्माण गरिएका होटलहरूले पर्यटकलाई थेग्न सकेको छैन। पर्यटकको चापलाई ध्यानमा राखेर होटलको संख्या थप्नुपर्ने देखिएको छ । आन्तरिक पर्यटकहरु जति तिलिचो तालमा पुग्छन्, त्यति थोरङला पास गएको पाइँदैन । प्रचार–प्रसारको अभाव यसको मुख्य कारण भएको स्थानीय बताउँछन् ।
कसरी पुग्ने ?
लमजुङ सदरमुकाम बेँसीसहर अन्नपूर्ण पदयात्रा मार्गको प्रवेशद्वारको रुपमा चिनिन्छ । बेँसीसहरबाट खुदी, भूलभूले, ङादी, स्याँगे, जगत तथा मनाङ जिल्लाको ताल, बगरछाप, चामे हुँदै थोराङ पास पुग्न सकिन्छ ।
बेसीसहरबाट करिब २० दिनको पैदल यात्रमा पार हुने यस थोरङला पास अहिले ९ दिनमा नै पार गर्न सकिन्छ । पर्यटक मनाङ जिल्लाको ताल धारापानी चामे हुँदै माथि मनाङ पिसाङ, घ्यारु, ङाओल, भ्राका र मनाङगाउँ पुगेर दुई ३ दिनको रेस्टपछि थोरङलातिर लाग्ने गर्छन् ।
