मध्यपुरथिमिमा आजदेखि एकमहिने लिग फुटबल प्रतियोगिता सुरु हुँदै Nepalpatra मध्यपुरथिमिमा आजदेखि एकमहिने लिग फुटबल प्रतियोगिता सुरु हुँदै
१४ मंसिर २०७९, बुधबार

मध्यपुरथिमिमा आजदेखि एकमहिने लिग फुटबल प्रतियोगिता सुरु हुँदै


मध्यपुरथिमि नगरपालिका

भक्तपुर । मध्यपुरथिमि नगरपालिकाको आयोजनामा पहिलो पटक आजदेखि एकमहिने मध्यपुरथिमि वडाव्यापी लिग फुटबल प्रतियोगिताको सुरु हुँदैछ ।

नगरपालिकाले हिजो खेल मैदानमा आयोजना गरेको पत्रकार सम्मेलनमा यसबारे जानकारी दिँदै मध्यपुर युथ एसोसिएशनको संयोजनमा प्रतियोगिता असोज ८ देखि कात्तिक ७ गतेसम्म सञ्चालन हुने नगरप्रमुख सुरेन्द्र श्रेष्ठले बताए ।

राष्ट्रिय तथा अन्तर्राष्ट्रिय खेलाडी उत्पादन गर्ने उद्देश्यले नगरपालिकाले अब हरेक वर्ष वडा लिगको आयोजना गरेर फुटबल खेलको ‘हव’का रूपमा नगरपालिकालाई विकास गर्ने नगरपालिकाका उपप्रमुख विजय श्रेष्ठले जानकारी दिए ।

मध्यपुरथिमिका स्थायी बासिन्दाले मात्रै सहभागिता जनाउन पाउने गरी प्रत्येक वडाबाट एकएकवटा टोली सहभागी हुने प्रतियोगिता राउन्ड रोबिन लिगअनुसार खेलाइनेछ । प्रतियोगितामा कूल ३६ खेल हुनेछ भने प्रत्येक टोलीले आठ खेल खेल्ने प्रतियोगिताका संयोजक एवं मध्यपुर युथ एसोसिएशनका उपाध्यक्ष अष्टकुमार कवेँले बताए ।

कार्यक्रमका सभापति एवं एसोसिएशनका अध्यक्ष उपेन्द्रमान सिंहले प्रतियोगिताको विजेतालाई आकर्षक ट्रफीका साथै रु दुई लाख ५० हजार, दोस्रो हुनेलाई रु एक लाख २५ हजार र तेस्रो हुनेलाई रु ६० हजार पुरस्कार तथा प्रतियोगिताको अनुशासित टोलीलाई नगद रु २५ हजारसहित फेयरप्ले अवार्ड प्रदान गरिने जानकारी दिए ।

प्रतियोगितामा सर्वोत्कृष्ट खेलाडीले रु २० हजार, उत्कृष्ट गोलकिपर, मिडफिल्डर, डिफेन्डर र स्ट्राइकरले जनही रु १० हजार पुरस्कार प्रदान गरिने बताउँदै उनले प्रत्येक खेलका उत्कृष्ट खेलाडीलाई ‘म्यान अफ दी म्याच’को ट्रफी प्रदान गरिने जानकारी दिए ।

प्रतियोगिताको कूल अनुमानित लागत रु २५ लाख रहेकामा नगरपालिकाले रु २० लाख उपलब्ध गराएको छ भने बाँकी रकम स्थानीय बैंकहरुले सहयोग गर्ने भएको प्रतियोगिताका प्रचारप्रसार संयोजक हरिदास प्रजापतिले जानकारी दिए । उनले सहभागी प्रत्येक टोलीलाई जर्सी र फुटबल उपलब्ध गराएको र खेलाडीहरुको दुर्घटना बीमा गरिएको बताए ।


यो समाचार पढेर तपाईको प्रतिक्रिया के छ ?

प्रतिक्रिया दिनुहोस !