सौराहा । नेकपा एमालेको १० औँ महाधिवेशनको दोस्रो दिनको बन्दसत्रमा अध्यक्ष केपी शर्मा ओली प्रवेश गरेका छन् । ओली बन्दसत्र शुरु हुन लागेको होटल पार्क सफारीमा पुग्दा समर्थकहरुले उनको पक्षमा नाराबाजी गरेका छन् ।
तर अध्यक्षको अर्का प्रत्यासी समेत रहेका वर्तमान उपाध्यक्ष भीम रावल बन्दसत्र हलवाट बाहिरिएका छन् । उनी अध्यक्षमण्डलकाे बैठकमा सहभागी हुन बाहिरिएकाे बताइएतापनि सर्वसम्मतिको नाममा अध्यक्ष ओलीले एकलौटी गरेको भनेर असन्तुष्टि जाहेर गर्दै बाहिरिएको आशंका गरिएको छ ।
एमालेमा दुई पोखरेलले वरिष्ठ उपाध्यक्ष र महासचिवमा बाजी मार्ने संकेत देखिएको छ । सौराहामा रहेका एमालेका ओलीनिकट एक नेताका अनुसार अध्यक्ष केपी शर्मा ओलीले वरिष्ठ उपाध्यक्षमा ईश्वर पोखरेल र महासचिवमा शंकर पोखरेलको नाममा सहमति जुटाएको बताएका छन् ।
ओलीनिकट ती नेताका अनुसार सर्वाधिक पेचिलो बनेको वरिष्ठ उपाध्यक्ष र महासचिव पदमा पोखरेलद्वयले बाजी मार्ने बुझेपछि रावल असन्तुष्ट प्रकट गर्दै सम्भावित उक्त घोषणा हुनुअघि रावल बन्दसत्र बाहिरिएको बुझिएको छ । लामो रस्साकस्सीपछि एमालेले केन्द्रिय सदस्य तथा पदाधिकारीको नाम टुंगो लागेको हो ।
ओलीका समर्थकहरुले ‘वि लभ यू केपी बा’, ‘आज होइन भोलिलाई, १० वर्ष ओलीलाई’ ‘पार्टी फुटाउने मतियार होसियार’ भन्दै नारा लगाइरहेका छन् । बाक्लो भीडमा उनलाई सुरक्षाकर्मीले सुरक्षाघेरामा हालेर बन्द सत्रमा प्रवेश गराएका हुन् ।
ओलीका समर्थकहरुले ‘पार्टी फुटाउने मतियार होसियार’, ‘ओलीसँगको जोरी, त्यही तिम्रो कमजोरी’, ‘भीम रावल गद्दार हो’, ‘नक्कली राष्ट्रवाद, मुर्दावाद’ भन्दै उनीहरुले अध्यक्ष अर्का प्रत्यासी भीम रावलबिरुद्ध नाराबाजी गरेका हुन् ।
यो पनि पढ्नुहोस्
ओली बन्दसत्र हलमा प्रवेश, समर्थकद्वारा रावलविरुद्ध नाराबाजी
एमालेमा दुई पोखरेलले वरिष्ठ उपाध्यक्ष र महासचिवमा बाजी मार्ने संकेत
