सुर्खेत । कर्णाली प्रदेशको मुख्यमन्त्रीमा नेपाली कांग्रेस कर्णाली संसदीय दलका नेता जीवनबहादुर शाही नियुक्त भएका छन् । कर्णालीका नवनियुक्त मुख्यमन्त्री शाहीले आजै राती साढे ८ बजे शपथ लिँदैछन् ।
नवनियुक्त मुख्यमन्त्री शाहीले शपथपछि आजै कार्यभार सम्हाल्ने भएका छन् । मुख्यमन्त्रीमा नियुक्त भएपछि शाहीले कर्णालीको समग्र विकास गर्दै नागरिकलाई सम्पन्न बनाउने अभियानमा जुट्ने आफ्नो सरकारको प्रमुख प्राथमिकता हुने बताएका छन् ।
कर्णालीका प्रदेश प्रमुख गोविन्दप्रसाद कलौनीले मुख्यमन्त्री पदमा नियुक्तिका लागि दाबी पेश गर्न प्रदेशसभा सदस्यलाई आह्वान गरेपछि शाहीले मात्र दाबी पेश गरेपछि उनलाई कर्णालीका प्रदेश प्रमुख गोविन्दप्रसाद कलौनीले मुख्यमन्त्रीमा नियुक्त गरेका हुन् ।
प्रदेश प्रमुख कलौनीले प्रदेशसभामा कुनै पनि दलको स्पष्ट बहुमत नरहेको अवस्थामा दुई वा दुईभन्दा बढी दलको समर्थनमा बहुमत प्राप्त गर्न सक्ने सदस्यलाई आज साँझ ७:३० बजेभित्र मुख्यमन्त्री पदमा नियुक्तिका लागि दाबी पेश गर्न आह्वान गरेपछि शाहीले दाबी पेश गरेका थिए ।
शाहीले नेपाली कांग्रेस, नेकपा माओवादी केन्द्र र नेकपा (एकीकृत समाजवादी) का प्रदेशसभा सदस्यको समर्थनमा उनले प्रदेश प्रमुख कलौनी समक्ष मुख्यमन्त्रीमा दावी पेश गरेका हुन् ।
उनले माओवादी केन्द्रबाट १२ जना, कांग्रेसबाट ६ जना, एकीकृत समाजवादीबाट ३ जना गरेर २१ सांसदको हस्ताक्षरसहित मुख्यमन्त्रीको दाबी पेश गरेका थिए । कर्णाली प्रदेशसभा हाल ३५ सदस्यीय रहेकाले मुख्यमन्त्रीमा दावी पेश गर्न १८ सांसदको समर्थन भए पुग्छ ।
२०७४ फागुन ३ गते मुख्यमन्त्री नियुक्त भएका महेन्द्र शाहीले गत वैशाख ३ गते विश्वासको मत लिने क्रममा कांग्रेससँग भएको सत्ता सहकार्यको सहमति कार्यान्वयन गर्न सोमबार राजीनामा दिएका थिए ।
यो पनि पढ्नुहोस्
कर्णाली प्रदेशको मुख्यमन्त्रीमा जीवनबहादुर शाही नियुक्त
कर्णालीको मुख्यमन्त्रीमा जीवनबहादुर शाहीद्वारा दावी पेश
कर्णाली प्रदेश प्रमुखद्वारा मुख्यमन्त्रीको दाबी पेश गर्न आह्वान
कर्णालीमा काँग्रेसका जीवनबहादुर शाहीलाई मुख्यमन्त्री बन्ने बाटो खुल्यो
