विराटनगर । प्रदेश १ का नेकपा (एमाले) बाट निर्वाचित १० जना सांसदले माधव कुमार नेपाल नेतृत्वको नेकपा (एकीकृत समाजवादी) पार्टी रोजेपछि मुख्यमन्त्री भीम आचार्य एक सातामै अल्पमतमा परेका छन् ।
१० जना सांसदले प्रदेश निर्वाचन आयोगको कार्यालयमा पुगेर नेकपा (एस) पार्टीमा सनाखत गरेपछि उनी अल्पमतमा परेका हुन् । अल्पमतमा परेपछि उनले अब विश्वासको मत लिनुपर्ने भएको छ ।
नेकपा एमाले छाडेर नेकपा (एस) रोज्नेहरुमा राजेन्द्र राई, राजन राई, उपेन्द्र घिमिरे, सावित्रा रेग्मी, खिनु लङ्वा लिम्बू, गणेश काङ्माङ, कृष्णकुमारी राई, पदमकुमारी गुरुङ, सुनिता चौधरी र सरिता थापा रहेका छन् ।
९२ सदस्यीय प्रदेश १ प्रदेशसभामा एमालेका ५१ सांसद थिए । दल विभाजन भएपछि नेकपा एमालेका १० सांसदले नेकपा एकीकृत समाजवादी रोजेपछि प्रदेशसभामा एमाले सांसदको संख्या ४१ जनामा झरेको छ ।
प्रदेशमा नेपाली काङ्ग्रेसका २१, माओवादी केन्द्रका १५, जनता समाजवादी पार्टीमा ३ र अन्य दुई साना दलामा १/१ जना सांसद छन् । प्रदेशमा सरकार गठनका लागि ४७ सांसदको समर्थन आवश्यक पर्छ ।
प्रदेश १ मा एकल बहुमत रहेको एमाले नेतृत्वको सरकार विभाजनपछि संकटमा परेको छ । माधव नेपालले एमाले विभाजन गरेर नेकपा (एस) नामक दल दर्ता गराएपछि अहिलेसम्म प्रदेश १ मा समाजवादी पार्टीको पक्षमा १० जना मात्रै सांसद देखिएका छन्।
एमालेले सांसद संख्या पुर्याउन नसक्दा गत बिहीबार मात्रै मुख्यमन्त्री बनेका आचार्य नेतृत्वको सरकार लगभग ढल्ने निश्चित भइसकेको छ । उनी नेतृत्वको सरकार ढालेर प्रदेश १ मा कांग्रेस, माओवादी, एकीकृत समाजवादी सहितको गठबन्धनबाट नयाँ सरकार बनाउन लागेका हुन् ।
यसअघि निर्वाचन आयोगले नेकपा एमालेबाट विभाजित भइ बनेको नेकपा (एकीकृत समाजवादी) का तर्फबाट निर्वाचित जनप्रतिनिधिले दल रोज्न पाउने समयसीमा दिएको थियो ।
आयोगले दल दर्ताका लागि निवेदन दिएको मिति भदौ २ गतेदेखि २१ दिनभित्र अर्थात् भदौ २२ गतेभित्र यी दुवै पार्टीका प्रदेशसभा सदस्य र स्थानीय तहका सदस्यले निर्वाचन कार्यालयमा उपस्थित भएर सनाखत गर्न निर्देशन दिएको थियो ।
यो पनि पढ्नुहोस्
प्रदेश १ मा एमालेका १० सांसदले रोजे नेकपा (एस)
सुदूरपश्चिममा पनि एमालेका १० सांसदले रोजे नेकपा (एकीकृत समाजवादी)
वाग्मतीमा एमालेका १२ सांसदले रोजे नेकपा (एकीकृत समाजवादी)
भदौ २२ गतेसम्म एमाले र जसपाका जनप्रतिनिधिलाई दल रोज्न आयोगको निर्देशन
