काठमाडौ । लामो रस्साकस्सी पछि अन्तत: नेकपा एमाले विभाजन भएको छ । नेता माधव कुमार नेपालले पार्टी विभाजन गर्दै आफ्नै नेतृत्वमा नयाँ दल नेकपा (एकीकृत समाजवादी) दर्ताका लागि निर्वाचन आयोगमा निवेदन दिएसंगै एमाले औपचारिक रुपमा विभाजन भएको हो ।
एमालेलाई विभाजन गराएर नेकपा (एकीकृत समाजवादी) गठन गरेका नेपालले राष्ट्रपति विद्यादेवी भण्डारीसँग भेटवार्ता गरेका छन् । आज सोमबार विहान पौने १२ बजेदेखि पौने २ वजे सम्म नेपाल र राष्ट्रपति भण्डारीका वीचमा भेटवार्ता भएको नेपाल निकट स्रोतले बताएको छ ।
नेपाल निकट स्रोतका अनुसार नेपाल र राष्ट्रपति भण्डारी वीचमा एमाले विभाजन र पछिल्लो राजनीतिका विषयमा केन्द्रित भएको वताएको छ । राष्ट्रपति भण्डारीले एमालेभित्रको आन्तरिक विवादमा यसअघि पनि विशेष चासो राखेर सक्रियतापूर्वक भूमिका खेलेको भनेर उनको आलोचना हुँदै आएको छ ।
एमाले अध्यक्ष केपी शर्मा ओलीको निजी निवास बलकोटमा ओलीसहित सो समूहका नेताहरु र माधव नेपालको साथ छाडेका एमालेको तेस्रो धारका नेताहरुवीच आज बार्ता भईरहँदा यता राष्ट्रपति भण्डारी र नेपालका वीचमा भेटवार्ता हुनुलाई राजनीतिक वृत्तमा विशेष चासोका साथ हेरिएको छ ।
यसअघि पनि ओली प्रधानमन्त्री नै भएको बेला उनलाई विशवासको मत दिने नदिनेमा निर्णायक छलफल चलिरहेका बेला पनि राष्ट्रपतिले नेपाललाई शीतल निवासमा बोलाएर छलफल गरेकी थिइन् । २०७८ साल वैशाख २३ गते बिहीबार नेता नेपाल कांग्रेस सभापति शेरबहादुर देउवासँग उनकै निवास बुढानिलकण्ठमा करीव १ घण्टाको छलफलपछि सोझै राष्ट्रपति भण्डारीलाई भेट्न नेपाल शीतल निवास पुगेका थिए ।
आज बालकोटमा भएको बार्तापछि एमाले प्रवक्ता प्रदिप ज्ञवालीले बोल्दै ललितपुरको च्यासलस्थित तुल्सीलाल स्मृति प्रतिष्ठानमा भोलि बस्ने एमाले स्थायी कमिटि बैठकमा तेस्रो धारका नेताहरु पनि सहभागी हुने बताए । उनले भोलि हुने बैठकबाट नेपाललाई नयाँ दल दर्ता रोक्दै एकताका लागि आह्वान समेत गर्ने सम्भावना रहेको बताए ।
नेपालले दल दर्ताका लागि निवेदन दिइसकेको र भोलिसम्म सनाखत गर्ने बेला संघीय संसद र केन्द्रीय कमिटीमा रहेका नेताहरूले आफ्नो कित्ता प्रष्ट पार्नुपर्ने भएको बेला आज नेपाल र राष्ट्रपति भण्डारीका वीचमा भएको भेटवार्तालाई अर्थपूर्ण रुपमा मानिएको छ ।
यो पनि पढ्नुहोस्
एमालेले बोलायो स्थायी कमिटि बैठक, तेस्रो धारका नेताहरु पनि सहभागी हुने
बालकोटमा ओली र माधव नेपाल छाडेका तेस्रो धारका नेताहरुबीच वार्ता
ओलीले भेट नदिएपछि एमालेको तेस्रो धारका नेताहरु निराश, पार्टी छोड्ने मनस्थितिमा
