बजेट पारित हुन नसकेपछि लुम्बिनीमा मध्यराति नै संसद् अधिवेशन अन्त्य Nepalpatra बजेट पारित हुन नसकेपछि लुम्बिनीमा मध्यराति नै संसद् अधिवेशन अन्त्य
२१ आश्विन २०७९, शुक्रबार

बजेट पारित हुन नसकेपछि लुम्बिनीमा मध्यराति नै संसद् अधिवेशन अन्त्य


लुम्बिनी प्रदेशसभा

बुटवल । लुम्बिनीमा प्रदेश सरकारले प्रस्तुत गरेको बजेट पारित हुने नदेखिएपछि प्रदेश प्रमुख धर्मनाथ यादवले बिहीबार मध्यराति संसद् अधिवेशन नै अन्त्य गरेका छन् । राति अबेर जारी विज्ञप्तिमा मन्त्रिपरिषद्को सिफारिसमा अधिवेशन अन्त्य गरिएको उल्लेख छ ।

आर्थिक वर्षको अन्तिम दिनसम्म प्रदेश सरकारले प्रस्तुत गरेको आगामी आर्थिक वर्ष २०७८/७९ को बजेट पारित हुन सकेको थिएन । विपक्षी गठबन्धनले दुईपटक प्रदेश सभामा दर्ता गरेको अविश्वास प्रस्ताव छल्दै आएका मुख्यमन्त्री शंकर पोखरेल बजेट पास गर्न असफल भएपछि बिहीबार बैठक छाडेर हिँडेका थिए ।

आर्थिक वर्षको अन्तिम दिनसम्म पनि प्रदेश सभाबाट बजेट पारित नभएसँगै शुक्रबारदेखि लुम्बिनी प्रदेशमा राज्यकोषबाट कुनै पनि रकम खर्च गर्न मिल्दैन । यससँगै मुख्यमन्त्री पोखरेलको सत्ता–संकट थप चुलिएको छ ।

लुम्बिनी प्रदेश सभामा बहुमतका लागि ४२ सांसद आवश्यक पर्छ । तर, सरकारसँग हाल ४१ जना सांसद मात्रै छन् । विपक्षी गठबन्धनमा भने कांग्रेसका १९, माओवादीका १८, जसपाका तीन र राष्ट्रिय जनमोर्चाका एकजना गरी ४१ जना सांसद सरकारको विपक्षमा छन् ।

यस्तो अवस्थामा सभामुखको भोट निर्णायक मानिन्छ । लुम्बिनी प्रदेशमा सभामुख माओवादी केन्द्रका तर्फबाट छन् । आफूलाई बलियो देखेको विपक्षीले लुम्बिनी प्रदेशको बजेटलाई प्रक्रियामार्फत टुंगोमा पुर्‍याउनुपर्ने बताएको छ भने सत्तापक्षले सहमतिबाट बजेट पास गर्नुपर्ने बताएको छ ।

प्रस्तुत गरेको आर्थिक वर्ष २०७८/७९ को बजेटमाथिको छलफल समाप्त भएपछि बिहीबार मन्त्रीहरू तथा मुख्यमन्त्रीले जवाफ दिएका थिए । त्यसपछि निर्णयार्थ प्रस्तुत गर्ने क्रममा मुख्यमन्त्रीसहित सत्तापक्षका सांसद नै प्रदेश सभा बैठकबाट बाहिरिएका थिए ।

बैठकमा सत्तापक्षका प्रमुख सचेतक भूमिश्वर ढकालले छलफलका लागि समय माग गरेका थिए । तर, छलफलका लागि प्रतिपक्ष दल तयार नभएपछि बैठक छाडेर सत्तापक्ष बाहिरिएको थियो ।

सभामुख पूर्णबहादुर घर्तीले सत्तापक्षका सांसद तथा मन्त्री नै बैठकबाट बाहिरिएपछि आधा घन्टाका लागि बैठक स्थगित गरेका थिए । तर, त्यसबीचमा दलहरूबीच सहमति नजुटेपछि सूचना टाँस गरेर बैठक शुक्रबार बस्ने गरी स्थगित गरिएको थियो ।

लुम्बिनी प्रदेशमा प्रदेश सरकार अल्पमतमा रहँदै आएको विपक्षी गठबन्धनको आरोप छ । जालझेल गरेर सत्तामा टिकिरहेको भन्दै विपक्षी गठबन्धनले नैतिकताका आधारमा राजीनामा दिन मुख्यमन्त्रीलाई सुझाब दिँदै आएका छन् ।

प्रदेश सभाको बजेट पारित हुन नसकेपछि विपक्षी गठबन्धनले सत्ता परिवर्तन र बजेट पारित एकैपटक गर्ने रणनीति बनाएको छ । विपक्षी गठबन्धनले मतदानबाट बजेट टुंगो लगाउन जोड गरेको छ । तर, संसद्मा बहुमत गुमेको आशंकामा सत्तापक्षले प्रक्रियामा जान आनाकानी गरेको छ । सहमतिमा बजेट पास गर्ने सत्तापक्षको चाहना छ ।

प्रदेश सरकारका आर्थिक मामिला तथा योजनामन्त्री बैजनाथ चौधरीले अहिले सत्तापक्षसँग पनि बहुमत नभएको र विपक्षी गठबन्धनसँग पनि बहुमत नभएकाले सहमतिमै बजेट पास गरौँ भन्ने प्रस्ताव आफूहरूको रहेको बताए । बजेट पास गरेपछि विश्वासको मत लिने प्रक्रिया अगाडि बढाउन आफूहरू तयार रहेको उनको भनाइ छ ।

तर, विपक्षी गठबन्धनले भने बजेट प्रक्रियाबाटै अघि बढाउनुपर्ने आफ्नो ‘बटमलाइन’ भएको बताएको छ । कांग्रेस प्रमुख सचेतक फखरुद्दिन खानले सत्तापक्षसँग बजेटका सन्दर्भमा कुनै सहमति नभएको भन्दै प्रक्रियाबाट टुंगोमा पुर्‍याउनुपर्ने बताए ।


यो समाचार पढेर तपाईको प्रतिक्रिया के छ ?

प्रतिक्रिया दिनुहोस !