फाइल फोटो 
काठमाडौँ । नेकपा एमाले माधवकुमार नेपाल-झलनाथ खनाल समूहले पार्टी अध्यक्ष एवं प्रधानमन्त्री केपी शर्मा ओली नेपालको कम्युनिस्ट आन्दोलन छिन्नभिन्न र ध्वस्त बनाउन लागेको निष्कर्ष निकालेको छ । अध्यक्ष ओलीले सोमबार नेता नेपाल र भीम रावललाई पार्टी सदस्यबाट ६ महिनाका लागि निलम्बन गरेपछि मंगलबार बसेको नेपाल–खनाल समूहको स्थायी कमिटी बैठकले यस्तो निष्कर्ष निकालेको हो ।
यसअघि ओलीले आफू र पार्टीविरुद्ध गतिविधि गरेको भन्दै नेता नेपाल, रावल, सुरेन्द्र पाण्डे र घनश्याम भुसाललाई स्पष्टीकरण सोधेका थिए । नेपाल–खनाल समूहको स्थायी कमिटीको बैठकपछि जारी वक्तव्यमा ओलीका कदमले कम्युनिस्ट आन्दोलनमा धक्का पुगेको उल्लेख छ ।
वक्तव्यमा स्थायी कमिटीमा नेपाल-खनाल पक्षका सबै सदस्यको हस्ताक्षर छ । बैठकपछि नेता रावलले ओलीका पछिल्लो कदमले पार्टीलाई झन् विभाजित र अन्योलग्रस्त बनाएको बताए । उनले ओलीले विधानविपरीत केन्द्रीय समितिलाई तोडमरोड गरी महाधिवेशन आयोजक समितिमा रूपान्तरण गरेकाले आफूहरू पनि समानान्तर समिति बनाउँदै अघि बढ्ने बताए ।
नेपाल–खनाल पक्षमा रहेका स्थायी कमिटी सदस्यहरूले जारी गरेको वक्तव्यमा प्रधानमन्त्री एवं अध्यक्ष ओली राज्यसत्ता दुरूपयोग गर्दै तानाशाही लाद्ने र कम्युनिस्ट आन्दोलन ध्वस्त पार्ने दुष्प्रयासमा लागेको आरोप लगाइएको छ ।
वक्तव्यमा साबिक एमाले र माओवादी केन्द्रबीचको एकताविरुद्ध ओलीले अनेकौं षड्यन्त्र गरेको तथा फागुन २३ गते सर्वोच्च अदालतको फैसलापछि पुनर्जीवित एमालेलाई समेत विभाजन गरी नेपालको कम्युनिस्ट आन्दोलन विसर्जन गर्ने गतिविधि गरेको आरोप लगाइएको छ।
उनीहरूले एमाले पुनर्जीवित भएपछि केन्द्रदेखि स्थानीय तहसम्मका सबै संगठनात्मक संरचना तथा जनसंगठनलाई पूर्ववत् क्रियाशील गर्न प्रस्ताव गरे पनि ओलीले लत्याएर एकतर्फी निर्णय गरेको बताएका छन् ।
उल्टै फागुन २८ गते हामीलाई कुनै जानकारी नदिईकन प्रधानमन्त्रीको सरकारी निवास बालुवाटारमा आफ्नो गुटको भेला गरी पार्टी विधानको ठाडो उल्लंघन गर्दै नवौं राष्ट्रिय महाधिवेशनबाट निर्वाचित केन्द्रीय कमिटी भंग गरियो र कथित राष्ट्रिय महाधिवेशन आयोजक कमिटी बनाइयो ।
वक्तव्यमा मुलुकमा भ्रष्टाचार र अनियमितताको चाङ लाग्न थालेको तथा जनताप्रतिको उत्तरदायित्व र सुशासनका सबै मान्यता भत्किन थालेको उल्लेख छ। नेपाल र नेपालीको स्वाभिमानमा धक्का लाग्ने गरी बाह्य शक्तिसँग साठगाँठ गर्दै ओलीले देश, जनता र कम्युनिस्ट पार्टीलाई कमजोर तुल्याउने काम जारी राखेको पनि उनीहरूले बताएका छन् ।
सत्ता, शक्ति र स्रोतको उन्मादले ओलीले पार्टी विभाजनको रेखालाई फराकिलो बनाउन नवौं राष्ट्रिय महाधिवेशनद्वारा निर्वाचित वरिष्ठ नेता माधवकुमार नेपाल, उपाध्यक्ष भीम रावल, उपमहासचिव घनश्याम भुसाल र स्थायी कमिटीका सदस्य सुरेन्द्र पाण्डेलाई अनेक झुटा आरोप लगाउँदै कथित स्पष्टीकरण सोधियो।
वरिष्ठ नेता नेपाल र उपाध्यक्ष रावललाई विभिन्न झुटा लाञ्छना लगाउँदै ६ महिनाका लागि पार्टी सदस्यबाट निलम्बन गर्नु पार्टी विधानविपरीत र स्वेच्छाचारी कार्य भएको ठहर बैठकले गरेको छ । पार्टीभित्र विचार र संगठनको सम्बन्धमा छलफल र बहसको ढोका बन्द गरी ओलीले एमालेलाई विभाजन र छिन्नभिन्न गर्ने दुराशय राखेको वक्तव्यमा उल्लेख छ । यो समाचार आजको नागरिक दैनिकमा प्रकाशित छ ।
