काठमाडौँ । प्रधानन्यायाधीश चोलेन्द्रशमशेर जबराको राजीनामा माग्दै इजलास बहिष्कार गरेका सर्वोच्च अदालतका ५ जना न्यायाधीश भोलिदेखि नियमित काममा फर्किने भएसंगै प्रधानन्यायाधीश जबरालाई राहत मिलेर केही हदसम्म संकट मोचन हुने संकेत देखिएको छ ।
सर्वोच्चका ५ जना न्यायाधीशहरुले न्यायाधीश, नेपाल बार एसोसिएसन र सर्वाेच्च अदालत बार एसोसिएसनको बैठक बहिष्कार गरेका थिए । सर्वोच्चका १९ न्यायाधीशमध्ये बैठक बहिष्कार गर्ने न्यायाधीशहरूमा तेजबहादुर केसी, बमकुमार श्रेष्ठ, कुमार चुडाल, कुमार रेग्मी र मनोज शर्मा रहेका छन् ।
प्रधानन्यायाधीश जबराले आन्दोलनरत न्यायाधीशहरुलाई वार्तामा आउन आग्रह गरेपछि न्यायाधीशहरूले नेपाल बार र सर्वोच्च बारका पदाधिकारीसँग गरेको बैठक सर्वोच्चका ५ न्यायाधीशले नै बहिष्कार गरेसंगै सर्वोच्चकै आन्दोलनरत न्यायाधीशहरूबीच नै फाटो देखिएको हो ।
५ न्यायाधीशहरूले बैठक बहिष्कार गरेपछि आजको बैठक निष्कर्षविहीन टुंगिएको थियो भने भोलि पुन: बैठक बस्ने भएको छ । प्रधानन्यायाधीश जबराले आज बिहान एक विज्ञप्ति जारी गर्दै आफू संवादका लागि तयार रहेको भन्दै वार्तामा आउन आग्रह गरेपनि नेपाल बारले भने प्रधानन्यायाधीश जबरासँग वार्तामा नबस्ने बताएको थियो ।
आज नेपाल बार एशोसिएसनले इजलास बहिष्कार गर्दै आएका न्यायाधीशहरूसँग भेट्न गएको थियो । नेपाल बार र सर्वोच्चबारका ७ जना पदाधिकरी भेट्न जाँदा १३ न्यायाधीशमात्र उपस्थित थिए । प्रधानन्यायाधीश जबराको वार्ता आह्वान अस्वीकार गरेका उनीहरू आफ्ना पदाधिकारी लिएर सर्वोच्चका अरू न्यायाधीशलाई भेट्न गएका थिए ।
यो पनि पढ्नुहोस्
न्यायाधीशहरूबीच नै फुट : ५ न्यायाधीशले गरे बैठक बहिष्कार
पूर्वन्यायाधीश फोरमको अपिल : प्रधानन्यायाधीशविरुद्ध महाभियोग लगाउनुपर्छ
प्रधानन्यायाधीशको वक्तव्य भ्रष्टाचार लुकाउन गरिएको दुष्प्रचार भएको पूर्व न्यायाधीश फोरमको आरोप
प्रधानन्यायाधीश जबरासँग वार्तामा नबस्ने नेपाल बारको निर्णय
प्रधानन्यायाधीशले वक्तव्य जारी गर्दै गरे बारलाई वार्तामा आउन आग्रह
