२८ मङ्सिर, काठमाडौँ । शेयर बजार सुधारको माग राख्दै आएका शेयर लगानीकर्ता समूह र सरकारले गठन गरेको कार्यदलबीच आज वार्ता भएको छ ।
अर्थ मन्त्रालयका उपसचिव गोविन्दप्रसाद सुवेदीले आन्दोलनरत शेयर लगानीकर्तालाई पत्रमार्फत वार्तामा बोलाउनुभएको थियो । अर्थमन्त्री डा युवराज खतिवडाले नेपाल राष्ट्र बैंकका डेपुटी गर्भनर शिवराज श्रेष्ठको संयोजकत्वमा यही मङ्सिर २० गते कार्यदल गठन गर्नुभएको थियो ।
सो कार्यदलले अर्थमन्त्री डा खतिवडालाई प्रतिवेदन बुझाउने तयारी गरिरहेको बेला आन्दोलनरत पक्षसँग वार्ता भएको हो । कार्यदलले शेयर लगानीकर्ता समूहका प्रतिनिधिलाई आमन्त्रित सदस्यका रुपमा सहभागी गराउने र माग सम्बोधन गर्ने प्रतिबद्धता जनाएको छ ।
वार्तामा शेयर लगानीकर्ताका तर्फबाट उत्तम अर्याल, नयन्द्र बाँस्तोलालगायत सहभागी हुनुहुन्थ्यो । कार्यदलले लगानीकर्ताको माग सम्बोधन गर्न अधिकतम प्रयास गर्ने जनाएको छ । (रासस)
