जहाँ हाँस्न खोज्नेलाई खुलेर हाँस्न दिऊँ !
रोइरहेका हरुको आँशु पुछी हाँसो दिऊँ !!
केही गर्छु भन्नेलाई कदापि हतास पनि पार्दै नपारौँ !
बरु सकेको सहयोग र साथ समयमा हामी सबैको सबै नेपालीलाई दिऊँ !!
नेपाली नेपाली मिलेमा जड्घार कठीन हजार नि तर्न सकिन्छ !
जसले जे जे असहयोग गरेपनि, सुखले देशमा हाँस्दै बाँच्न सकिन्छ !!
अरुले देशलाई के गरे भन्दा पनि, हामीले के के दियौँ यो शोचौँ !
देश सुन्दर समृद्द पार्नलाई सहज वातावरण कति दियौँ यो बुझौँ !!
मरेपछी बिचरा, कठै भन्ने, बानी जति अहिल्यै छोडौँ हामी !
जीवनकालमै सहयोग दिई हाँस्न र खुशी हुन दिऊ अनि !!
देश भन्दा ठुलो केही छैन भनेर हामीले बुझ्नु नै पर्छ !
देशकालागि साँच्चै गर्नेलाई समयमै साथ सबैले दिनुपर्छ !!
सगरमाथाको शोभाले भरिएको यो मेरो प्यारो हाम्रो देशमा !
नदी;नालाहरु शक्ति बोकेर नागबेली भई बगेको सुन्दर प्रदेशमा !!
ईश्वरमा अपार आस्था बोक्ने नेपालीको यो सुन्दर भूमिमा !
मनका असल नेपालीहरु, रमाउन चाहने पावन प्रदेशमा !!
यसैले यो प्यारो देशलाई चन्दन झैँ पवित्र बनाउनुपर्छ !
देशको शोभा बढाउन र निकास, समृद्दि ल्याउन लागि पर्नुपर्छ !!
असल सोच हरेक नेपाली हृदयमा अव भने सँधै नै पलाओस् !
एकले अर्को नेपालीलाई सहयोग र साथ दिने भाव आओस् !!
एकताको सुत्र बनाई त्यागको भावना मनमा विकास गरौँ !
यो देश समृद्द बनुन्जेलसम्म हातेमालो र मन मिलाऊँ !!
काँशको फूलझै पवित्र हामीले जन्म भूमि पार्नु पर्छ !
लाली गुराँस र चाँप चमेली ,सुनाखरिले देश सजिनु पर्छ !!
नेपालीले नेपालीलाई हरपल सहयोग र साथ दिने !
यस्तो शोच हरेक मनमा नेपालीले चिताउनुपर्छ नि !!
गण्डकीको पवित्र जलझैँ देश पनि पावन बनाउनु पर्छ !
टुक्रामा हैन छातीमा देशको सग्लो स्वरुप कोरिनु पर्छ !!
धानका बाला झुले जसरी देश छातीमा झुलाउनु पर्छ !
सगरमाथाको समृद्धिले नै मेरो देशको पहिचान बढ्नुपर्छ !!
नेपालीका आँखाबाट अव आँशु जति सबै झिकिनु पर्छ !
सबैको मुहार भरि खुशीको हाँसो खोजेर हामीले ल्याउनु पर्छ,पर्छ !!
घामका किरणको शक्ति मन र माटोमा भर्नु हामीले पर्छ !
चन्द्रको मायाँ र जतनले मुटु यस्तै हरपल रम्नु पर्छ !!
हरेक खोलानाला अव यो देशका पवित्र भै बग्न पाउनु पर्छ !
डाँडाकाँडा फलफूलहरु लगाई लटरम्मपारी भर्नु पर्छ !!
एकताको शंख घोष देशमा मिलेर हामीले फुक्नु पर्छ !
नत हाम्रो यो जीवनको सार र अर्थ ब्यर्थ जान्छ !!
देश भन्दा ठुलो हो यो कुरा बुझ्नु नै पर्छ !!
छिमेकको समृद्दि र विकास ह्रेरेर यो देश बन्नु पर्छ !!
*शोभा काफ्ले खतिवडा लेखक, साहित्यकार, सामाजिक अभियन्ता हुनुहुन्छ ।
यो पनि पढ्नुहोस्
प्रधानमन्त्रीलाई पत्र – लोकतन्त्रका बन्दी हामी नेपाली
प्रधानमन्त्रीलाई अनुरोध पत्र – त्याग र तपले बनोस मेरो देश
प्रधानमन्त्रीलाई पत्र – शान्तिको भूमि
प्रधानमन्त्री ओलीलाई अनुरोध पत्र – हाम्रा आशाहरु
छोरीको प्रश्न बाबालाई – कसरी आउँछ र बाबा ?
कविता – जसो गरी हुन्छ यो भूमि सुन्दर पारौँ
कविता – म हिमाल रोपौ यो छातीमा
कविता – हामी नमिले बन्दैन मुलुक
