काठमाडौं । चर्चित भारतीय युट्युबर ध्रुव राठी पक्राउ परेका छन् । भारतीय चर्चित राजनीतिक युट्युबर राठी शनिबार बिहान पक्राउ परेका हुन् ।
भारतको कक्रोच जनता पार्टीको प्रदर्शन आह्वानका बीच राठीलाई प्रहरीले गुरुग्रामको सेक्टर ५६ स्थित उनकै निवासबाट पक्राउ गरेको भारतीय सञ्चारमाध्यमले जनाएका छन् ।
राठीलाई पक्राउ गर्न ५० जनाको हाराहारीमा प्रहरी पुगेको थियो । सुरक्षाकर्मीको टोलीले शुक्रबार बेलुकादेखि नै उनको निवासको निगरानी गरिरहेको थियो ।
जर्मनीमा बसोबास गर्ने उनी कक्रोच जनता पार्टीको प्रदर्शनमा सहभागी हुन भारत आइपुगेका थिए । निर्वाचन आयोगका प्रमुख ज्ञानेश कुमारको राजीनामा माग्दै शनिबार कक्रोच जनता पार्टीले दिल्लीस्थित जन्तर मन्तरमा प्रदर्शनको आह्वान गरेको छ ।
प्रदर्शनलाई ध्यानमा राख्दै दिल्लीको सुरक्षा व्यवस्था चुस्त पारिएको छ भने इन्टरनेट सेवा ठप्प पारिएको छ । दिल्लीका सडकमा हजारौँ प्रहरी र अर्धसैनिक बल परिचालन गरिएको छ । प्रदर्शनका कारण सडक यातायात र रेल सेवा प्रभावित भएको छ ।
शुक्रबार अबेर साँझ, ध्रुव राठीले सामाजिक सञ्जालमा एउटा रिल पोस्ट गरेका थिए । भिडियोमा, उनी इन्डिया गेट अगाडि हिँडिरहेको देखिन्थ्यो ।
