काठमाडौँ। नेपाली कांग्रेसका सभापति गगन थापाले पार्टीको १५औँ महाधिवेशनमा पेस गर्न तयार पारेको राजनीतिक प्रतिवेदनमा प्रधानमन्त्रीलाई दुई कार्यकालमा सीमित गर्ने संवैधानिक व्यवस्थाको प्रस्ताव अघि सारेका छन् । कांग्रेसका सभापति थापाले १५औँ महाधिवेशनमा पेश गर्न तयार पारेको राजनीतिक प्रतिवेदनमा पार्टीको राजनीतिक, वैचारिक, सांगठनिक र आर्थिक रूपान्तरणका लागि महत्वपूर्ण प्रस्ताव अघि सारेका छन् ।
प्रतिवेदनले कांग्रेसको विगतको समीक्षा गर्दै पछिल्लो समय सत्ता, पद, गुट र पहुँचकेन्द्रित राजनीतिका कारण जनतासँग दूरी बढेको स्वीकार गरेको छ । अब पार्टीलाई नयाँ राजनीतिक संस्कार र कार्यशैलीसहित अघि बढाउने प्रस्ताव प्रतिवेदनमा गरिएको छ ।
आज आइतबार काठमाडौंको खुलामञ्चमा कांग्रेसको महाधिवेशन सुरू भएको छ । उक्त महाधिवेशनमा सभापति थापाले प्रधानमन्त्रीलाई दुई कार्यकालमा सीमित गर्ने संवैधानिक व्यवस्था गर्ने प्रस्ताव अघि सारेका हुन् ।
प्रधानमन्त्रीको कार्यकालमा सीमा तोक्ने प्रस्तावले कार्यकारी नेतृत्वमा लामो समयसम्म एउटै व्यक्ति रहने अवस्थालाई संवैधानिक व्यवस्थामार्फत सम्बोधन गर्न खोजेको देखिन्छ। त्यसैगरी निर्वाचनमा ‘नन अफ द अबभ’ (राइट टु रिजेक्ट) को विकल्प र विदेशमा रहेका नेपालीलाई मतदानको अधिकार दिने प्रस्ताव अघि सारेका छन् ।
प्रतिवेदनमा नेपालको निर्वाचन प्रणालीलाई थप सहभागीमूलक र पारदर्शी बनाउने तथा राजनीतिक, वैचारिक, सांगठनिक र आर्थिक रूपमा पार्टीको रूपान्तरण गर्ने विषय समेटिएका छन्। विदेशमा रहेका नेपाली नागरिकलाई पनि मतदानको अधिकार दिने प्रस्तावले देशबाहिर रहेका नेपालीलाई निर्वाचन प्रक्रियामा सहभागी गराउने विषयलाई जोड दिएको छ ।
