काठमाडौ । पूर्वप्रधानमन्त्री समेत रहेका नेकपा माओवादी केन्द्रका अध्यक्ष पुष्पकमल दाहाल ‘प्रचण्ड’ले पारिवारिक भ्रमणको क्रममा धुलिखेल पुगेर जिपलाइन गरेका छन् ।
नाति नातिनीसहित प्रचण्डले क्लासिक जिपलाइनको अनुभव लिएका हुन् । साहासिक गतिविधिमा रुचि राख्ने प्रचण्डले आफूले जिपलाइनको निक्कै मज्जा लिएको बताएका छन् । प्रचण्डले पारिवारिक घुमघाममा यस्ता गतिविधि गर्दा अझै रमाइलो भएको प्रचण्डको भनाई छ ।
काठमाडौंबाट करिब ३५ किलोमीटर दूरीमा रहेको धुलिखेल जिपलाइन २०७५ फागुनदेखि व्यवसायिक रुपमा सञ्चालनमा आएको हो । धुलिखेलस्थित थाक्लेडाँडाबाट टेक अफ भई खावा, पाँचखालमा जिप लाइनको ल्याण्डिङ स्टेसन रहेको छ भने जिपलाइनको कुल दुरी ११०० अर्थात् १.१ किलोमिटर रहेको छ ।
जिपलाइन सञ्चालित स्थानबाटै प्रसिद्ध हिमश्रृङ्खला लाङटाङ, दोर्जेलाक्पा, फूर्बीच्याचू लगायतका हिमाल समेत अवलोकन गर्न सकिन्छ ।
तस्वीर सौजन्य : बिष्णु कान्त घिमिरे
