२० वैशाख, काठमाडौं । सत्तारुढ नेपाल कम्युनिष्ट पार्टी (नेकपा) ले वैशाख २५ गते बिहान ११ बजे स्थायी कमिटी बैठक बोलाउने निर्णय गरेको छ । साथै बैठकको एजेण्डा तय गर्न अघिल्लो दिन वैशाख २४ गते दिउँसो ३ बजे सचिवालयको बैठक बस्ने छ ।
बैठक सकिएलगतै नेकपा प्रवक्ता नारायणकाजी श्रेष्ठले सो कुराको जानकारी दिएका हुन् । आज बसेको उक्त बैठकले पार्टीका उपाध्यक्ष वामदेव गौतमलाई उपयुक्त समयमा प्रतिनिधि सभामा लैजाने निर्णय गरेको छ । साथै आज बेलुकी बसेको उक्त बैठकले प्रधानमन्त्री एवं पार्टी अध्यक्ष केपी शर्मा ओलीले आत्मालोचना गरेका छन् ।
नेकपाको स्थायी कमिटीमा ४५ सदस्यहरु रहेका छन् । नेकपाका २० जना स्थायी कमिटी सदस्यहरुले तत्काल स्थायी कमिटीको बैठक बस्नुपर्ने लिखित माग गरेर दुवै जना अध्यक्षलाई पत्र बुझाई सकेका छन् । तर प्रधानमन्त्री ओलीले स्थायी कमिटीको बैठक आवश्यक नरहेको र बैठक गरिए आफू उपस्थित नहुने अडान राख्दै आएका थिए ।
प्रवक्ता श्रेष्ठले पार्टीलाई एकतावद्ध राख्ने, पार्टीलाई विधि पद्धति र कम्युनिष्ट मूल्य मान्यता अनुसार सञ्चालन गर्ने, पार्टीको मार्गनिर्देशनमा सरकार सञ्चालन गर्ने र सरकारले देश र जनताको पक्षमा समाजवाद उन्मुख सामाजिक आर्थिक रुपान्तरणको लक्ष्य हासिल गर्ने गरी काम गर्ने दिशामा दृढतापूर्वक अगाडि बढ्ने निर्णय लिएको बताएका छन् ।
अर्का अध्यक्ष पुष्पकमल दाहाल ‘प्रचण्ड’ र अरु नेताहरुले पनि आत्मालोचना गरेर अगाडि बढ्ने नेकपाको निर्णय छ । बैठकले पार्टीलाई फुट उन्मुख गराउने कुनै पनि क्रियाकलापमा सहभागी नहुन नेता कार्यकर्तालाई निर्देशन समेत दिएको छ ।
बामेदव गौतमलाई प्रधानमन्त्री र वरिष्ठ नेता माधवकुमार नेपाललाई तेस्रो अध्यक्ष बनाउने प्रस्ताव राखेपछि नेकपा सचिवालयको पहिलो बैठक बसेको थियो । समग्रमा यस्ता निर्णय गरेर सकिएको बहुप्रतिक्षित नेकपाको सचिवालय बैठकपछि नेकपाको आन्तरिक विवाद केहि समय कम भएको विश्लेषण गर्न सकिन्छ ।
यो पनि पढ्नुहोस्
वामदेवलाई प्रतिनिधि सभामा लैजाने नेकपा सचिवालयको निर्णय
राष्ट्रपति भण्डारी र प्रधानमन्त्री ओलीवीच भेटवार्ता
