काठमाडौँ । नेपाली कांग्रेसको केन्द्रीय कार्यसम्पादन समितिको बैठक आज सुरु भएको छ । नयाँवानेश्वरस्थित सङ्घीय संसद् भवनको शङ्कर हलमा कांग्रेसको केन्द्रीय कार्यसम्पादन समितिको बैठक सुरु भएको भएको हो ।
कांग्रेस केन्द्रीय कार्यसम्पादन समितिको बैठकमा शेरबहादुर देउवा, डा. रामशरण महत, रमेश लेखक, सुनिल थापा, जिपछिरिड लामा, गाेपालमान श्रेष्ठ, गगन थापा, विश्वप्रकाश शर्मा, बालकृष्ण खाँड लगायतको उपस्थिति रहेको छ ।
कांग्रेस केन्द्रीय कार्यालयका मुख्यसचिव कृष्णप्रसाद पौडेलले समसामयिक राजनीतिक घटनाक्रमका बारेमा छलफल गर्न आइतबार बैठक आह्वान गरिएको जानकारी दिए ।
कांग्रेसको केन्द्रीय कार्यसम्पादन समितिको बैठकपछि संसदीय दलको बैठक पनि आजै बस्ने भएको छ । प्रतिनिधिसभाको बैठक पनि आज दिउँसो १ बजे बस्दैछ ।
आज बस्ने बैठकमा प्रधानमन्त्री एवं कानुन, न्याय तथा संसदीय मामिलामन्त्री पुष्पकमल दाहाल ‘प्रचण्ड’ले “बेपत्ता पारिएका व्यक्तिको छानबिन, सत्य निरुपण तथा मेलमिलाप आयोग (तेस्रो संशोधन) विधेयक, २०७९” पेस गर्ने सम्भावित कार्यसूची रहेको छ ।
यसैगरी प्रधानमन्त्री पुष्पकमल दाहाल ‘प्रचण्ड’ ले भोलि प्रतिनिधिसभाबाट विश्वासको मत लिने भएका छन् । काँग्रेसको केन्द्रीय कार्यसम्पादन समिति र संसदीय दलको बैठक यो विषयमा पनि छलफल हुने बुझिएको छ ।
