धनगढी । सुदूरपश्चिम प्रदेशसभाको बैठक सरेको सर्यै छ । मुख्यमन्त्री राजेन्द्रसिंह रावलले विश्वासको मत लिने गरी हिजो दिउँसो १ बजेका लागि बोलाइएको बैठक स्थगित गरिएपछि आज बिहीबार दिउँसो १ बजे बस्ने भनिएको बैठक आज ४ बजेसम्मका लागि स्थगित गरिएको हो ।
गत पुस २७ गते मुख्यमन्त्रीमा नियुक्त भएका रावलले संवैधानिक व्यवस्था अनुसार आज माघ २६ गते अन्तिम दिन भएकोले आजभित्र विश्वासको मत लिइसक्नुपर्ने बाध्यता रहेको छ ।
यद्यपि उनले विश्वासको मत पाउने भने निश्चित छैन । विश्वासको मत पाउनको लागि निर्णायक मानिएको नागरिक उन्मुक्ति पार्टीले विश्वासको मत दिने निश्चित नहुँदा मुख्यमन्त्री रावलको पद धरापमा परेको छ ।
नागरिक उन्मुक्तिले आफ्नो माग सम्बोधन नभएकोले मुख्यमन्त्री रावललाई विश्वास मत नदिने निर्णय गरेको अध्यक्ष रञ्जिता श्रेष्ठले बताएकी छिन् ।मुख्यमन्त्री रावलले अहिलेसम्म एमाले, माओवादी र राप्रपाको मत पाउने निश्चित भएपनि गठबन्धनकै दल नागरिक उन्मुक्तिले भने विश्वासको मत नदिने भएको हो ।
सुदूरपश्चिम प्रदेशमा नागरिक उन्मुक्ति पार्टीका ७ जना सांसदहरु केही दिनअघि काठमाडौंमै रहेका छन् । आफ्ना पार्टीका माग पुरा नगरेसम्म सरकारलाइ विश्वासको मत नदिने भनेर उनीहरुले अडान राख्दै आएका छन् । उक्त पार्टीले जेलमा रहेका रेशम चौधरीलगायत टीकापुर घटनामा जोडिएकाहरूलाई रिहाइ गर्नुपर्ने लगायत माग राख्दै आएका छन् ।
यो पनि पढ्नुहोस्
सुदूरपश्चिमका मुख्यमन्त्रीले विश्वासको मत लिने आज अन्तिम दिन
मुख्यमन्त्रीले विश्वासको मत नपाउने भएपछि सुदूरपश्चिमका प्रदेशसभाको बैठक स्थगित
