काठमाडौं । विपक्षी गठबन्धनले नेपाली कांग्रेसकी ईश्वरी न्यौपानेले सभामुख पदको लागि उम्मेदवार बनाउने भएको छ । विपक्षी गठबन्धनले काँग्रेसकी सांसद न्यौपानेले सभामुखमा उम्मेदवार बनाउने निर्णय गरेको हो ।
न्यौपानेको प्रस्तावकमा नेपाली काँग्रेसका महामन्त्री विश्वप्रकाश शर्मा र समर्थकमा नेपाल एकीकृत समाजवादीका प्रकाश ज्वाला रहेका छन् ।
आज बुधबार बिहान पार्टी सभापति शेरबहादुर देउवाको निवास धुम्बाराहीमा बसेको कांग्रेस पदाधिकारीहरुको बैठकले सभामुखमा उम्मेदवारी दिने निर्णय गरेको थियो । बैठकमा काँग्रेसको तर्फबाट अम्बिका बस्नेत, ईश्वरी न्यौपाने र सरिता प्रसाईंलाई उम्मेदवार बनाउने बारेमा छलफल भएको थियो ।
यता सत्ता साझेदार दल नेकपा (एमाले) का सांसद देवराज घिमिरेले सभामुखको उम्मेदवार दर्ता गरेका छन् । एमालेमा घिमिरेले नयाँ वानेश्वरस्थित संघीय संसदको ल्होत्से हलमा पुगेर मनोनयन दर्ता गराएका हुन् ।
घिमिरेको उम्मेदवारीको प्रस्तावकमा एमालेका सुवासचन्द्र नेम्वाङ र समर्थकमा हितराज पाण्डे, रवि लामिछाने र राजेन्द्र लिङ्देन रहेका छन् । सत्ता गठबन्धन दलका तर्फबाट प्रतिनिधिसभाको सभामुखमा एमालेका घिमिरेले उम्मेदवारी दिएका हुन् ।
झापा निर्वाचन क्षेत्र नम्वर २ बाट प्रतिनिधिसभा सदस्यमा निर्वाचित सांसद घिमिरेलाई एमालेसहित माओवादी केन्द्र, रास्वपा र राप्रपाका नेताबीच भएको सहमतिअनुसार सभामुखको उम्मेदवार बनाइएको हो ।
यो पनि पढ्नुहोस्
एमालेका देवराज घिमिरेद्वारा सभामुख पदको लागि उम्मेदवारी दर्ता
सभामुखको उम्मेदवार टुंगो लगाउनुअघि देउवालाई प्रचण्डको फोन, ओली शशंकित
कांग्रेसले महिलालाई सभामुखको उम्मेदवार बनाउने, यी हुन सम्भावित अनुहारहरु
