फाइल फोटो 
काठमाडौँ । पूर्वप्रधानमन्त्री समेत रहेका सत्तासाझेदार दल नेकपा (माओवादी केन्द्र) का अध्यक्ष पुष्पकमल दाहाल ‘प्रचण्ड’ ले अर्का पूर्वप्रधानमन्त्री एवं जनता समाजवादी पार्टी (जसपा) को उपेन्द्र यादव समूहले कारबाहीमा परेका संघीय परिषद् अध्यक्ष डा. बाबुराम भट्टराईबीचको भेटवार्ता बाक्लिएको छ ।
अस्ति र हिजो पनि भेटवार्ता भएका दुई पूर्वप्रधानमन्त्रीहरु प्रचण्ड र बाबुरामबीच आज पनि भेटवार्ताको तयारी गरिएको छ । प्रचण्डको सचिवालयले दिएको जानकारी अनुसार दुई शीर्ष नेताहरुबीच पुनः आज पनि भेट्ने तयारी रहेपनि कुन ठाउँ र कुन समय भेट हुने भन्ने बारेमा अहिलेसम्म भने तय भइनसकेको बताइएको छ ।
हिजो बुधबार ललितपुरस्थित प्रचण्डका नातेदारको घरमा नेताद्वयबीच भएको भेटमा प्रचण्डले बाबुरामलाई पार्टी एकता गरी नेकपा (समाजवादी केन्द्र) बनाउन प्रस्ताव गरेका थिए । अस्ति मंगलबार पनि प्रचण्ड र बाबुरामबीच सिंहदरबारस्थित माओवादी संसदीय दलको कार्यालयमा भेटवार्ता भएको थियो ।
प्रचण्डको सचिवालय स्रोतका अनुसार केही दिनदेखि भट्टराई लगायतका नेतासँग निरन्तर भेटघाट जारी रहेको र सोही क्रममा हिजो बुधबार बिहान पनि भट्टराईसँग भेट भएको जनाएको हो । यद्यपि भट्टराईले सुरुमा आफू कम्युनिष्ट पार्टीमा नफर्कने बताएपनि छलफल गरेर अगाडि बढ्ने प्रतिक्रिया दिएका थिए ।
भट्टराईलाई केही दिनअघि जनता समाजवादी पार्टीको उपेन्द्र यादव समूहले कारबाही गरेको थियो । नेकपा (समाजवादी केन्द्र) बनाउने विषयमा बाबुरामको प्रचण्डसँग छलफल जारी रहेको छ । प्रचण्ड र बाबुरामबीच एउटै पार्टीमा बनाउने गरी गहन छलफल चलिरहेको हो ।
यद्यपि बाबुराम पार्टीको नाम कम्युनिष्ट नराखी जाने पक्षमा देखिएका छन् भने प्रचण्ड भने कम्युनिष्ट राखेर जानुपर्ने पक्षमा रहेका छन् । दुई नेताहरुबीच आगामी निर्वाचनमा पनि एउटै घोषणापत्र ल्याउने गरी छलफल जारी रहेको स्रोतले बताएको छ ।
यो पनि पढ्नुहोस्
प्रचण्डको बाबुरामलाई प्रस्ताव : नेकपा (समाजवादी केन्द्र) बनाऔं
प्रचण्डले भने- हेर्दै जानुहोला अब वामपन्थीहरू नजिक हुँदै जान्छौँ
