काठमाडौं । प्रमुख प्रतिपक्षी दल नेकपा एमालेका तेस्रो धार नेताहरुले १० बुँदे सहमति कार्यान्वयन नभएको भन्दै बैठक बहिस्कार गर्ने चेतावनी दिएका छन् । ललितपुरको च्यासलस्थित तुलसीलाल प्रतिष्ठानमा आज शुक्रबारदेखि शुरु भएर २ दिनसम्म चल्ने केन्द्रीय कमिटीको बैठकमा उपाध्यक्ष भीम रावलले १० बुँदे सहमति कार्यान्वयन नभएको भन्दै असन्तुष्टि जनाएका हुन् ।
उपाध्यक्ष रावलसहित तेस्रो धारका नेताहरुले एमाले एकताका लागि प्रस्ताव गरिएको १० बुँदे सहमति कार्यान्वयनका लागि जारी भएको अन्तरपार्टी निर्देशन (अपानि) को समीक्षा गर्न माग पनि गरेका छन् । उनीहरुले एकता प्रस्तावको अक्षरश: पालना र विधान महाधिवेशनमा प्रतिनिधि छनोटबारे प्रष्ट धारणा नबन्दासम्म बैठकमा नबस्ने चेतावनी दिएका हुन् ।
यद्यपि अध्यक्ष केपी शर्मा ओलीले यसबारे स्थायी कमिटीमा छलफल गर्ने आश्वासन दिएका छन् । असार २७ गते भएको १० बुँदे कार्यान्वयन गर्ने सहमतिपछि माधवकुमार नेपाल समूहमा रहेका दोस्रो पुस्ताका नेताहरु एमालेमै रहेका थिए ।
आज शुक्रबारको बैठकमा ३ वटा दस्तावेजमा समूहगत छलफल गर्न ८ वटा समूह बनाइएको छ । तर तेस्रो धारका १० नेता निकटका केन्द्रीय सदस्यहरुले एकता प्रस्ताव कार्यान्वयनको ग्यारेन्टी र विधान महाधिवेशनमा छनोट हुने प्रतिनिधिबारे स्पष्ट नभएसम्म कुनैपनि बैठकमा सहभागी नहुने बताएका हुन् ।
यो पनि पढ्नुहोस्
एमाले केन्द्रीय कमिटी बैठक बस्दै, यस्ता छन् आजका छलफलका एजेण्डाहरु
