काठमाडौँ । प्रमुख प्रतिपक्ष दल नेकपा एमालेले संसद अवरुद्ध गरेको छ । केही बेरअघि शुरु भएको प्रतिनिधिसभाको बैठकमा एमालेका प्रमुख सचेतक विशाल भट्टराईले आफ्नो धारणा राखेपछि एमालेका सांसदले सभामुख अग्निप्रसाद सापकोटाकोबिरुद्ध नाराबाजी गरेपछि सभामुखले प्रतिनिधिसभाको बैठक १५ मिनेटको लागि स्थगित गरेका छन् ।
एमालेका सांसदहरुले संसदीय मर्यादा नाघेर नाराबाजीमा गरेपछि सभामुख सापकोटाले संसदको नियम २१ को खण्ड ख र ग अध्ययन गर्न ध्यानाकर्षण गराएका थिए । तर एमाले सांसदले नाराबाजी नरोकेपछि अन्तत: सभामुख सापकोटाले बैठक १५ मिनेटका लागि स्थगित गरेका हुन् ।
एमालेले कारबाही गरेका सांसदलाई सभामुखले पदमुक्त नगरेको भन्दै उनीहरुले नाराबाजी गरेका हुन् । यसअघि एमालेका अध्यक्ष केपी शर्मा ओलीले आफूले कारबाही गरेका माधव नेपालसहित १४ जना सांसद उपस्थित भए प्रतिनिधिसभाको बैठक चल्न नदिने चेतावनी दिएका थिए ।
आज बुधबार दिउसो बसेको एमाले संसदीय दलको बैठकमा अध्यक्ष ओलीले कारबाही गरेका १४ जनालाई गेटबाट फर्काइन्छ कि फर्काइँदैन हेर्ने बताएका थिए । उनीहरु उपस्थित भए बैठक नै सुरु हुन नसक्ने उनले बताएका थिए । नियमावली अनुसार गैरसंसदको उपस्थितिमा संसद चल्न नसक्ने उनले बताएका थिए ।
यस्तै नेकपा एमालेका नेता एवं सांसद महेश बस्नेतले सभामुखलाई महाअभियोग लगाउनुपर्ने बताएका थिए । नेता बस्नेतले सिंहदरवारमा दिउसो बसेको संसदीय दलको बैठकमा बोल्दै सभामुख अग्निप्रसाद सापकोटाले नेकपा एमाले विभाजनका लागि महत्वपूर्ण भूमिका खेलेको भन्दै महाअभियोग लगाउनुपर्ने बताएका थिए ।
यो पनि पढ्नुहोस्
एमालेले कारबाही गरेका माधव नेपालसहित १४ सांसद उपस्थित भए संसद चल्न नदिने ओलीको चेतावनी
ल्होत्से हलमा एमाले संसदीय दलको बैठक जारी, संसद बैठक अवरुद्ध गर्न सक्ने
