काठमाडौं, साउन १। पार्टीभित्रको आन्तरिक विवादका कारण दुर्घटनाको संघारमा पुगेको सत्तारूढ दल नेपाल कम्युनिष्ट पार्टी (नेकपा) का दुई अध्यक्ष केपी शर्मा ओली र पुष्पकमल दाहाल ‘प्रचण्ड’ तथा अर्का बरिष्ठ नेता माधव कुमार नेपाल बीच आज बिहिवार भएको छलफल बिना निष्कर्ष टुंगिएपछि प्रधानमन्त्री ओलीले आफूनिकट नेताहरूलाई बिहीबार साँझ बालुवाटारमा बोलाएका छन् ।
उपप्रधानमन्त्री तथा नेकपा सचिवालय सदस्य ईश्वर पोखरेल, महासचिव विष्णु पौडेल, संसदीय दलका उपनेता सुवास नेम्वाङ लगायत स्थायी समिति सदस्य र सांसदहरू बालुवाटार छलफलमा सहभागी रहेको स्रोतले जानकारी दिएको छ । नेताहरूसँग प्रधानमन्त्री ओलीले भोलि बस्ने स्थायी समिति बैठकमा कसरी प्रस्तुत हुने भन्ने विषयमा छलफल गरिरहेका छन् ।
स्रोतका अनुसार दिउँसो प्रचण्ड र नेपालसँग भएको छलफलमा प्रधानमन्त्री ओलीले आफूले राजीनामा नदिने अडान दोहोर्याएका थिए । आफूले राजीनामा कुनै हालतमा नदिने तर विधिसम्मत तरिकाले जसरी हटाउने हो मलाई हटाउनुस् भनेर प्रधानमन्त्रीले प्रचण्ड-माधवलाई जवाफ दिएपछि भोलि बस्ने स्थायी समिति बैठकमा आफ्नो रणनीति बनाउन उनले आफूनिकट नेताहरूसँग छलफल गरेका हुन् ।
आजको छलफलका क्रममा प्रचण्डले पार्टीको विवाद समाधान गर्न बरिष्ठ नेता नेपालसँग पनि सहमति गर्नुपर्ने बताएका थिए । जवाफमा प्रधानमन्त्री ओलीले आफूहरू दुई जनाले पार्टी एकता गरेकाले नेपालसँग सहमति जरूरी नभएको बताएका थिए । कुरा नमिलेपछि तीन नेताहरूको छलफल बिना निष्कर्ष टुंगिएको थियो ।
गत असार १८ गतेदेखि स्थायी समिति बैठक बस्न सकेको छैन । सहमतिका लागि भन्दै पटक पटक स्थगित भएको स्थायी समिति बैठक पछिल्लो पटक सात दिनका लागि स्थगित भएको थियो । यसअघि एक्लाएक्लै भेट्दै आएका प्रचण्डले आज भने वरिष्ठ नेता माधव नेपाललाई पनि सहभागी गराएका थिए ।
पार्टीको आन्तरिक विवाद मिलाउन शीर्ष नेतृत्व सक्रिय भएपनि नेताका अडानले सहमति जुट्न सकेको छैन । प्रधानमन्त्री ओलीले दुईमध्ये एक पद छोड्नुपर्ने अडानमा प्रचण्ड र वरिष्ठ नेता माधव नेपाल समूह छन् । प्रधानमन्त्री ओलीले भने दुवै पद नछाड्ने स्पष्ट पारेका छन् । जसले गर्दा पार्टी विभाजन हुनसक्ने भन्दै नेताहरुबीच आन्तरिक छलफल र दौडधुप चलिरहेको छ ।
यो पनि पढ्नुहोस्
