फाइल फोटो
बैशाख २५, काठमाडौं । विश्व शान्तिको कामना गर्दै आज विहीबार साँझ देशभर दीप प्रज्ज्वलन गरिएको छ । बिहीबार साँझ ७ बजे घरघरमा दीप प्रज्ज्वल गरिएको हो । सरकारले २५६४ औँ गौतम बुद्ध जयन्तीका अवसरमा दीप प्रज्ज्वलन गर्न आह्वान गरेको थियो ।
नेपाल सरकारले आज बिहीबार बेलुका ७ बजे घरघरमा दीप प्रज्वलन गर्न आग्रह गरेको थियो । हिजो प्रधानमन्त्री निवास बालुवाटारमा बसेको मन्त्रिपरिषद्को बैठकले आज बैखाश २५ गते बुद्ध जयन्तीका अवसरमा साँझ दिप प्रज्ज्वलन गर्न पनि नागरिकहरुलाई आग्रह गरेको थियो ।
बुद्ध जयन्तीको अवसरमा कोरोनाको महामारीबाट मुक्ति मिलोस् भन्ने कामना पनि गरौं भनेर दिप प्रज्ज्वलन गर्न आग्रह गरिएको थियो । साथै कोरोना भाइरस (कोभिड-१९) देखिएका व्यक्तिहरुको उपचारमा खटिएको चिकित्सक तथा स्वास्थ्यकर्मीको सम्मानमा पनि घरघरमा दीप प्रज्वलन गर्ने निर्णय गरेको एक मन्त्रीले जानकारी दिएका थिए ।
बिहीबार साँझ राष्ट्रपति विद्यादेवी भण्डारीले महाराजगञ्जस्थित शीतल निवास परिसरमा दीप प्रज्ज्वलन गरेकी छन् । प्रधानमन्त्रीको सरकारी निवास बालुवाटारमा दीप प्रज्वलन गरिएको छ ।
त्यस्तै प्रधानमन्त्री केपी शर्मा ओलीले सरकारी निवास बालुवाटारमा विश्व शान्तिको कामना गर्दै दीप प्रज्वलन गरेका छन् । प्रधानमन्त्री निवास बालुवाटारमा दीप प्रज्वलनमा प्रधानमन्त्री केपी शर्मा ओली, उपप्रधानमन्त्री तथा रक्षामन्त्री ईश्वर पोखरेल, गृह मन्त्री राम बहादुर थापा, परराष्ट्रमन्त्री प्रदिप ज्ञवाली, स्वास्थ्य मन्त्री भानुभक्त ढकाल लगायतको उपस्थिती थियो ।
त्यस्तैगरी विभिन्न प्रदेशका मुख्यमन्त्रीहरु, सरकारी कार्यालयदेखि सर्वसाधारणका घरमा पनि दीप प्रज्ज्वलन गरिएको छ । बुद्धको जन्मथलो लुम्बिनीलाई पनि दीप बालेर झलमल बनाइएको छ ।
तस्वीरहरु : रासस, प्रधानमन्त्री र गृहमन्त्रीको सचिवालय तथा सूर्य थापाको फेसबुकवाट
यो पनि पढ्नुहोस्
बालुवाटारमा यसरी गरियो दीप प्रज्वलन (फोटो फिचर)
