काठमाडौँ । ‘मिस नेपाल २०२०’ को उपाधि काठमाडौँकी २३ वर्षीया नम्रता श्रेष्ठले जितेकी छन् । हिडेन ट्रेजरले आज शनिबार राति होटल पार्क भिलेजमा आयोजना गरेको ग्राण्ड फिनालेमा २० प्रतिस्पर्धीलाई पछि पार्दै उनले ‘मिस नेपाल वर्ल्ड २०२०’ को उपाधि जितेकी हुन् ।
मिस नेपालको २६ औं संस्करणमा श्रेष्ठले उपाधि हात पारेकी उनलाई ‘मिस नेपाल वर्ल्ड २०१९’ की अनुष्का श्रेष्ठले ताज पहिराएकी हुन् । किन्डरगार्डेन टिचर समेत रहेकी नम्रताले त्रैमासिक भत्ता र पुरस्कारको रुपमा २ लाख ५० हजार नगद साथै कार्यालय प्रयोजनका लागि गाडी समेत पाउने भएकी छिन् । मिस नेपाल श्रेष्ठ चीनमा हुने मिस वोर्ल्ड २०२१ मा प्रतियोगितामा नेपालको प्रतिनिधित्व गर्दै सहभागी हुनेछिन् ।
‘मिस नेपाल अर्थ’को उपाधि काठमाडौँकी २४ वर्षीया सुप्रिया श्रेष्ठले जितिन् भने ‘मिस नेपाल इन्टरनेशनल’को उपाधि महोत्तरीकी २४ वर्षीया सन्ध्या शर्माले जितिन् । यस्तै ‘मिस नेपाल सुप्रानेसनल’ उपाधि काठमाडौँकी २४ वर्षीया सिमल कनौजियाले जितिन् । उनीहरु तीनै जनाले नगद २ लाख ५० हजार रुपैया पाएका छन् ।
यस्तै प्रतियोगितामा मिस टुरिज्मको उपाधि रिया श्रेष्ठ, मिस फिटनेस सुभाङ्गी खत्री, मिस फोटोजेनेटिक आस्टिका श्रेष्ठ, मिस हेल्दी निहा सरकार लगायत ११ प्रकारका उपाधि समेत दिइएको थियो । ती पुरस्कारको राशि २५ हजार रुपैया रहेको छ ।
तस्वीर : प्रदीपराज वन्त, रासस
