काठमाडौं । नेपाल उद्योग बाणिज्य महासंघको बरिष्ठ उपाध्यक्षमा अञ्जन श्रेष्ठ निर्विरोध निर्वाचित भएका छन् ।
पहिलो चरणमा ३ जना उम्मेदवारमध्ये कसैले पनि ५० प्रतिशत मत कटाउन नसकेपछि दोस्रो चरणको निर्वाचनमा अञ्जन श्रेष्ठ र उमेशलाल श्रेष्ठबीच चुनावी प्रतिस्पर्धा हुने भएको थियो । तर अर्का प्रत्यासी उमेशलालले पनि अञ्जनलाई समर्थन गर्ने सहमति भएपछि उनी उद्योग बाणिज्य महासंघको बरिष्ठ उपाध्यक्षमा निर्विरोध निर्वाचित भएका हुन् ।
रामचन्द्र संघई पहिलो चरणको प्रतिस्पर्धाबाट बाहिरिएका थिए । महासंघको विधानअनुसार वरिष्ठ उपाध्यक्ष उम्मेदवारले ५० प्रतिशत मतभार कटाउनुपर्ने भएकोले दोस्रो चरणको निर्वाचन गर्नुपर्ने भएतापनि उमेशलालले अञ्जनलाई समर्थन गरेपछि पुन: निर्वाचन गर्नुपरेन ।
पहिलो चरणको निर्वाचनमा जिल्ला नगर, वस्तुगत र एसोसिएटमा खसेको कुल मतभारतमध्ये अञ्जनले सबैभन्दा धेरै ३७.९९ प्रतिशत मत प्राप्त गरे भने उमेशलालले ३१.५१ मत प्राप्त गरे । साथै रामचन्द्र संघईले ३०.४६ मत प्राप्त गरे ।
मतपरिणाम अनुसार एसोसिएटतर्फ कुल खसेको १६२० मतमध्ये संघईले ६१३ मत प्राप्त गरे साथै अञ्जनले ५७३ मत र उमेशलालले ४२६ मत प्राप्त गरे । साथै ८ मत बदर भयो ।
जिल्ला नगरतर्फ कुल खसेको ११७ मतमध्ये अञ्जनले ४७, संघईले ३९ र उमेशलालले २८ मत प्राप्त गरे । साथै ३ मत बदर भयो । वस्तुतगतर्फ खसेको १२३ मतमध्ये उमेृशलालले ६९, अञ्जनले ४१ र संघईले १२ मत प्राप्त गरे भने एक मत बदर भयो ।
यस्तै उद्योग वाणिज्य महासंघको एसोसिएट उपाध्यक्षमा संघई समूहकी ज्योत्सना श्रेष्ठ विजयी भएकी छन् । जिल्ला नगर उपाध्यक्षमा संघई प्यानलकै सुरकृष्ण वैद्य र वस्तुगत उपाध्यक्षमा उमेशलाल प्यानलका हेमराज ढकाल विजयी भएका छन् ।
महासंघको विधान अनुसार हालका वरिष्ठ उपाध्यक्ष चन्द्रप्रसाद ढकाल आगामी कार्यकालका लागि अध्यक्ष भएका छन् भने वरिष्ठ उपाध्यक्षमा चुनिएका अञ्जन ढकालको तीन वर्षे कार्यकाल सकिएपछि स्वतः अध्यक्ष हुने छन् ।
यो पनि पढ्नुहोस्
महासंघको वरिष्ठ उपाध्यक्षमा पुनः निर्वाचन : उमेश र अञ्जन भिड्ने
उद्योग वाणिज्य महासंघको वरिष्ठ उपाध्यक्षमा पुनः निर्वाचन हुने
एसोसिएट उपाध्यक्षमा संघई समूहकी ज्योत्सना श्रेष्ठ विजयी
