नेप्से ओरालो लाग्ने क्रम आज पनि जारी Nepalpatra नेप्से ओरालो लाग्ने क्रम आज पनि जारी
१३ मंसिर २०७९, मंगलबार

नेप्से ओरालो लाग्ने क्रम आज पनि जारी


नेप्से गिरावट

काठमाडौँ । नेपाल स्टक एक्सचेन्ज (नेप्से) परिसूचक ओरालो लाग्ने क्रमले आज पनि निरन्तरता पाएको छ ।

बुधबार ३९ अङ्कले घटेको नेप्से आज २३ दशमलव ५२ अङ्कले झरेर एक हजार आठ सय ९३ दशमलव ७० अङ्कमा कायम भएको हो । आज दुई सय २६ कम्पनीको ३१ लाख १४ हजार ६ सय ८९ कित्ता शेयर खरिद बिक्री हुँदा रु एक अर्ब ११ करोड ९४ लाख ६१ हजार चार सय ११ बराबरको कारोबार भएको छ ।

सबै समूहको उपसूचक रातो देखिएको छ । सबैभन्दा धेरै निर्जीवन बीमा समूहको उपसूचक ८८ दशमलव ५४ र जीवन बीमा समूहको उपसूचक ६९ दशमलव ७७ अङ्कले घटेको छ । त्यस्तै, बैंकिङ समूहमा नौ दशमलव २१, व्यापार समूहमा २१ दशमलव ७८, होटल तथा पर्यटन समूहमा २८ दशमलव दुई र जलविद्युत् समूहमा ४१ दशमलव १८ अङ्कको गिरावट देखिएको छ ।

वित्त समूहको उपसूचक ३८ दशमलव ४७, उत्पादन समूहको उपसूचक ६३ दशमलव ९७, लघुवित्त समूहको उपसूचक ५० दशमलव ५७, म्युचुअल फन्डको उपसूचक शून्य दशमलव १६ र अन्य समूहको उपसूचक ३३ दशमलव ५७ अङ्कले घटेको पनि नेप्सेले जनाएको छ ।

आज २१ कम्पनीको शेयर मूल्य बढेको छ भने बाँकी सबै कम्पनीको घटेको छ । सबैभन्दा धेरै मन्दाकिनी हाइड्रोपावर लिमिटेडको शेयर तीन दशमलव ९३ प्रतिशतले बढेको छ । सबैभन्दा बढी गुमाउनेमा भने अपर हेवाखोला हाइड्रोपावर कम्पनीको शेयर ६ दशमलव ९१ प्रतिशतले घटेको छ ।

सबैभन्दा धेरै शिवम् सिमेन्ट लिमिटेडको सबैभन्दा धेरै रु १० करोड २२ लाख ३५ हजार चार सय २८ बराबरको एक लाख ६२ हजार एक सय १५ कित्ता शेयर किनबेच भएको छ ।


यो समाचार पढेर तपाईको प्रतिक्रिया के छ ?

प्रतिक्रिया दिनुहोस !