काठमाडौँ । अखिल नेपाल फुटबल संघ (एन्फा) ले राष्ट्रिय टिमबाट निकालिएका खेलाडीलाई स-सम्मान आगामी प्रशिक्षणमा बोलाउने निर्णय गरेको छ । एन्फाको नवनिर्वाचित पहिलो कार्यसमितिको बैठकले खेलाडीलाई स-सम्मान प्रशिक्षणमा बोलाउने निर्णय गरेको हो ।
एन्फाले नेपाली राष्ट्रिय फुटबलका मुख्य प्रशिक्षक अब्दुल्लाह अल्मुताइरीले राष्ट्रिय टिमबाट बाहिर निकालेका सबै खेलाडीलाई स-सम्मान राष्ट्रिय टिममा फिर्ता बोलाउने निर्णय गरेको हो । मुख्य प्रशिक्षक अल्मुताइरीले आफ्नो अनुमतिविना बन्द प्रशिक्षण छाडेको भन्दै रोहित चन्द, अनन्त तामाङ, अञ्जन विष्ट, विशाल राईसहित १० खेलाडीलाई राष्ट्रिय टोलीबाट निकालेका थिए ।
अध्यक्षमा निर्वाचित भएलगत्तै नेम्वाङले खेलाडी प्रशिक्षक विवादबारे निर्णय गर्ने बताएका थिए । यस्तै प्रशिक्षकको विषयमा छानबिन समितिको प्रतिवेदन र कतार फुटबल एसोसिएसन लगायतसँग आवश्यक छलफलका आधारमा निर्णय लिइने भएको छ ।
बैठकले महासचिवमा किरण राई तथा कोषाध्यक्षमा रविन्द्र जोशीलाई मनोनयन गर्ने निर्णय गरेको छ । यस्तै अन्तर्राष्ट्रिय सम्बन्ध कमिटीमा नविन पाण्डेलाई चयन गरिएको छ ।
यो पनि पढ्नुहोस्
नवनिर्वाचित एन्फा अध्यक्ष नेम्वाङले लिए पद तथा गोपनीयताको सपथ
