काठमाडौं । विवेकशील साझा पार्टीका पूर्वअध्यक्ष रवीन्द्र मिश्र वरिष्ठ उपाध्यक्ष बनेर राष्ट्रिय प्रजातन्त्र पार्टी (राप्रपा) मा प्रवेश गर्ने भएका छन् । उनी बुधबार काठमाडौंमा एक औपचारिक कार्यक्रममार्फत राप्रपामा प्रवेश गर्न लागेका हुन् ।
राप्रपा र विवेकशील साझा पार्टीका पूर्वअध्यक्ष मिश्र समूहबीच भोलि एकीकरण हुने भएको हो । राप्रपाका अध्यक्ष राजेन्द्र लिङदेनले सामाजिक संजाल ट्वीटरमा लेख्दै राप्रपा र रवीन्द्र मिश्र नेतृत्वको बृहत् ध्रुवीकरण पक्षधर समूहबीच भोलि बुधबार दिउँसो १ बजे एकता घोषणा जानकारी दिएका छन् ।
मिश्रले विवेकशील साझा पार्टीको साधारण सदस्यबाट हिजो सोमबार साँझ पार्टी अध्यक्ष समीक्षा बास्कोटासक्षम पार्टीको साधारण सदस्यबाट समेत राजीनामा दिएका थिए । राप्रपामा प्रवेश गर्नको लागि मिश्रले विवेकशील साझा पार्टी परित्याग गरेका थिए ।
विवेकशील साझा पार्टीको अध्यक्षबाट मिश्रले जेष्ठ ११ गते बुधबार सामाजिक सञ्जालमार्फत स्थानीय तह निर्वाचनमा नतिजा अपेक्षित नआएका कारण नैतिकताका आधारमा राजीनामा दिएका थिए ।
स्थानीय निर्वाचनमा आएको परिणामको सम्पूर्ण जिम्मेवारी लिँदै मिश्रले पार्टी अध्यक्षको पदबाट नैतिकताको आधारमा त्यो दिनबाट राजीनामा दिएको घोषणा गरेका थिए भने उनी पार्टीको साधारण सदस्य भने रहिरहेका थिए । विगतमा मिश्रले बीबीसी नेपाली सेवा लामो समयसम्म पत्रकारिता गरेपछि राजनीतिमा होमिएका थिए ।
यो पनि पढ्नुहोस्
रवीन्द्र मिश्रले दिए विवेकशील साझाको साधारण सदस्यबाट राजीनामा
