फाइल फोटो
काठमाडौं । संघीय संसद भवन नयाँ वानेश्वरमा नेपाली काँग्रेसका सभापति समेत रहेका प्रधानमन्त्री शेरबहादुर देउवा र प्रमुख प्रतिपक्षी दल नेकपा एमालेका अध्यक्ष केपी शर्मा ओली वीचको छलफल जारी रहेको छ ।
आज बस्ने भनिएको प्रतिनिधिसभा बैठक नै स्थगित गरेर संसद् भवनमै प्रधानमन्त्री देउवा र एमाले अध्यक्ष ओली वीच जारी छलफललाई राजनीतिक वृत्तमा विशेष महत्वका साथ हेरिएको छ ।
जारी छलफलमा कांग्रेसका तर्फबाट सञ्चार तथा सूचना प्रविधिमन्त्री ज्ञानेन्द्रबहादुर कार्की र सांसद गगन थापा तथा एमालेका तर्फबाट वरिष्ठ उपाध्यक्ष ईश्वर पोखरेल र संसदीय दलका उपनेता सुवास नेम्वाङ पनि सहभागी रहेका छन् ।
सरकारको आग्रहमा आज बस्ने भनिएको प्रतिनिधिसभा बैठक भोलि दिउँसो १ बजे बस्नेगरी स्थगित गरिएको छ । कार्यव्यवस्था परामर्श समितिको बैठकमा सरकारले एक दिन समय मागेपछि आजको संसद बैठक स्थगित गरिएको हो ।
राजनीतिक दलका शीर्ष नेताहरुबीच एमसीसीका बारेमा सहमति जुटाउने प्रयास जारी रहेको छ । आज बिहीबार पनि प्रधानमन्त्री शेरबहादुर देउवा, माओवादी केन्द्रका अध्यक्ष पुष्पकमल दाहाल ‘प्रचण्ड’, नेकपा (एकीकृत समाजवादी) का अध्यक्ष माधव नेपालबीच एमसीसीका बारेमा सहमति जुटाउने प्रयास भएपनि निष्कर्षमा पुगेको थिएन ।
माओवादी केन्द्रका अध्यक्ष प्रचण्ड र प्रधानमन्त्री देउवावीच बालुवाटार भेटवार्तामा प्रचण्डले देउवालाई यथास्थितिमा एमसीसी अनुमोदन गर्न नसकिने भएकोले संसदमा थाती राख्न अनुरोध गरेका थिए ।
संसद बैठक नै स्थगित गरेर प्रमुख सतारुढ दल नेपाली काँग्रेस र प्रमुख प्रतिपक्षी दल एमालेका शीर्ष नेताहरु आपसी संवादमा जुटेका हुन् । सत्ता गठबन्धनमा रहेका दलहरूले संसद्मा टेबल भएको एमसीसी सम्झौतालाई पारित गर्न असहयोग गरेपछि देउवा र ओली संवादमा जुटेका हुन् ।
देउवानिकट काँग्रेस स्रोतका अनुसार यो छलफललाई सत्ता सहकार्यको निर्णायक प्रयासका रूपमा भएको बुझिएको छ । प्रधानमन्त्री देउवा संसदमा पेश भएको एमसीसी जुनसुकै गठबन्धन गरेर जसरी भएपनि पास गर्न चाहन्छन् ।
प्रतिनिधिसभाको आज बस्ने बैठकमा एमसीसी छलफलका लागि पेश गरिने कार्यसूची छलेर अर्थमन्त्री जनार्दन शर्मालाई पर्वतको सदरमुकाम कुस्मा प्रचण्डले पठाएपछि देउवा उनीसँग आक्रोशित भएका छन् ।
यसअघि गत आइतबारको प्रतिनिधिसभाको बैठकमा सञ्चार तथा सूचना प्रविधिमन्त्री ज्ञानेन्द्रबहादुर कार्कीले एमसीसी सम्झौता संसदमा टेवुल गरेका थिए । सो दिन पनि अर्थमन्त्री शर्मा अनुपस्थित भएपछि सञ्चारमन्त्री कार्कीले एमसीसी सम्झौता पेश गरेका थिए ।
मंगलबार साँझ बालुवाटारमा भएको छलफलमा प्रधानमन्त्री देउवाले आफूलाई सत्तारूढ गठबन्धनभित्रबाटै संसदमा टेबल भएको एसमीसी पारितका लागि असहयोग भएको भन्दै सहयोग गर्न अध्यक्ष ओलीलाई आग्रह गरेका थिए ।
देउवा र ओलीवीच यसअघि भएको बालुवाटार वार्तामा भित्रभित्रै ‘जेन्टल एग्रिमेन्ट’ भएको भन्ने चर्चा चल्न थालेको थियो । एमसीसी संसदमा टेवुल गर्न दिने तर अनुमोदन गर्न नदिने प्रचण्ड र माधव नेपालको दोहोरो चरित्रले देउवा वाक्कदिक्क भईसकेका छन् । आज जारी छलफललाई सत्ता सहकार्यको निर्णायक प्रयासका रूपमा बुझिएकोले नेपाली राजनीतिको पासा पल्टिने संकेत देखिन थालेको छ ।
