काठमाडौँ । प्रधानमन्त्री केपी शर्मा ओलीले भोलि असार ३० गते वुधबार मात्र प्रधानमन्त्रीको सरकारी निवास बालुवाटार छोड्ने भएका छन् । भोलि बुधबार बिहान ११ बजे उनी बालुवाटारबाट आफ्नो निजी निवास भक्तपुरको बालकोट सर्ने भएका हुन् ।
नेपाली कांग्रेसका सभापति समेत रहेका संसदीय दलका नेता शेरबहादुर देउवा आज प्रधानमन्त्रीमा नियुक्त भएका छन् । नवनियुक्त प्रधानमन्त्री देउवाको आज साँझ ६ बजे राष्ट्रपति कार्यालय शीतलनिवासमा सपथ हुने भएको छ ।
राष्ट्रपति विद्यादेवी भण्डारीले नेपाली कांग्रेसका सभापति देउवालाई प्रधानमन्त्री नियुक्त गरेकी हुन् । सर्वोच्च अदालतले प्रतिनिधि सभा विघटन बदर गर्दै देउवालाई प्रधानमन्त्रीमा नियुक्त गर्न परमादेश जारी गरेपछि सोही अनुसार राष्ट्रपति भण्डारीले देउवालाई प्रधानमन्त्री नियुक्त गरेकी छन् ।
अदालतले २८ घण्टाभित्र देउवालाई प्रधानमन्त्री नियुक्त गर्न हिजो सोमबार परमादेश दिएपछि राष्ट्रपतिले भण्डारीले देउवालाई प्रधानमन्त्रीमा नियुक्त गरेकी हुन् ।
निवर्तमान प्रधानमन्त्री ओलीले देशवासीका नाममा विशेष सम्बोधन गर्दैछन । आज मंगलबार दिउँसो २ बजे निवर्तमान प्रधानमन्त्री ओलीले सम्बोधन गर्ने भनिएतापनि अहिलेसम्म ओलीले देशबासीको नाममा गर्ने भनिएको सम्बोधन शुरु भएको छैन ।
सर्वोच्च अदालतको फैसलाले शेरबहादुर देउवालाई प्रधानमन्त्री नियुक्त गर्न परमादेश जारी भएपछि उक्त फैसलाको सम्मान गर्दै ओलीले मार्ग प्रशस्त गर्न गरेका छन् ।
