फाइल फोटो 
काठमाडौं । नेकपा (एमाले) को खनाल-नेपाल पक्षले समानान्तर कमिटी बनाउने निर्णय गरेको छ । खनाल-नेपाल पक्षको आज साँझ बसेको बैठकले माथिदेखि तलसम्म समानान्तर कमिटी बनाएर अघि बढ्ने निष्कर्ष निकालेको हो ।
नेकपा (एमाले) का अध्यक्ष समेत रहेका प्रधानमन्त्री केपी शर्मा ओली पक्षीय केन्द्रीय कमिटीको आज बालुवाटारमा बसेको विशेष बैठकले दशौं महाधिवेशन आगामी मंसिरमा गर्ने निर्णय गरेको छ । अविश्वासको प्रस्तावमा हस्ताक्षर गरेका आफ्ना सांसदलाई नाम फिर्ता लिन निर्देशन दिएको छ ।
खनाल-नेपाल पक्षले आज पार्टीको बालुवाटारमा भएको बैठकले गरेका निर्णयहरुलाई अस्वीकार गर्ने निर्णय पनि गरेको छ । अध्यक्ष ओलीले महासचिव बाहेक सबै पदाधिकारी खारेज गर्ने, आफू पक्षका नेताहरुको जिम्मेवारी खोस्ने लगायतको निर्णय गरेपछि खनाल नेपाल समूहको आकस्मिक बैठकले समानान्तर कमिटी बनाउने निर्णय गरेको हो ।
ओलीले बोलाएको केन्द्रीय समितिको विशेष बैठकले पार्टीमा नेताहरुको जिम्मेवारी हेरफेर गर्नुका साथ पूर्वमाआवादीका २३ नेतालाई केन्द्रीय समितिमा मनोनित गरेको थियो । उक्त निर्णय लगत्तै बसेको नेपाल समूहको बैठकले त्यसलाई स्वीकार नगर्ने निर्णय लिएको हो ।
चैत ४ गते राष्ट्रिय भेला गरेर समानान्तर कमिटीहरु घोषणा गर्ने निर्णय भएको स्रोतले बताएको छ । साथै शनिबार केन्द्रीय समिति र संसदीय दलको संयुक्त बैठक बोलाएर थप छलफल गर्ने समझदारी पनि भएको छ ।
यो पनि पढ्नुहोस्
भीम रावलले गर्जिदै भने, ‘ओलीले विधान मिचेर एकलौटी तवरले गरेको निर्णय अस्वीकार्य’
अविश्वास प्रस्तावबाट नाम फिर्ता लिन सांसदलाई निर्देशन, एमालेमा ७० वर्षे उमेर हद खारेज
