काठमाडौं । नेपाल प्रहरीको एसएसपी बढुवामा राजनीतिक शक्तिकेन्द्रको हस्तक्षेप बढेको छ । नेपाल प्रहरीमा ३२ वटा एसएसपी पद रिक्त छ । आफूनिकटकालाई एसएसपी बनाउन सत्तारूढ दलका शीर्ष नेताहरूले हस्तक्षेप गर्न थालेका हुन् ।
गृह मन्त्रालय र प्रहरी प्रधान कार्यालय भने ज्येष्ठता र कार्यसम्पादनका आधारमा एसएसपी बढुवा गर्ने तयारीमा छ । तर, पछिल्लो ब्याचका एसपीहरू शक्ति केन्द्रको आडमा ब्याच मिचेर जसरी पनि एसएसपी हुने दौडमा लागेपछि शक्तिकेन्द्रले गृहमन्त्री बालकृष्ण खाँड तथा प्रहरी महानिरीक्षक धीरजप्रताप सिंहलाई दबाब दिन थालेको स्रोतको दाबी छ ।
यस्तो दबाब राजनीतिक दलका शीर्ष नेताहरूबाटै पर्न थालेको हो । स्रोतका अनुसार आपूm बढुवामा पर्न केही एसपीहरू माओवादी अध्यक्ष पुष्पकमल दाहाल प्रचण्डकहाँ धाउन पुगेका छन् भने केही भने बालुवाटार धाउन थालेका छन् ।
गृह मन्त्रालय र प्रहरी प्रधान कार्यालय राष्ट्रिय अनुसन्धान विभागमा स्थान्तरण भएर आएका र २०५४ सालमा प्रहरी निरीक्षक भएका टोलीलाई बढुवा गर्ने पक्षमा छ ।
विभागमा ५ पुस २०५३ मा भर्ना भएका प्रहरी निरीक्षकलाई २५ पुस २०५८ मा नेपाल प्रहरीमा स्थान्तरण गरिएको थियो । त्यस टोलीमा बाँकी रहेका र २०५४ सालमा प्रहरी निरीक्षकमा भर्ना भएकालाई तानेर एसएसपीमा बढुवा गर्ने गृह मन्त्रालयको तयारी छ ।
गृह स्रोतका अनुसार २०५६ मा प्रहरी निरीक्षक बनेकाहरू पनि अहिले २०५३ र २०५४ को ब्याचलाई उछिनेर एसएसपी बन्ने दौडमा शक्तिकेन्द्रबाट दबाब दिनेगरी लबिङमा लागेका छन् । उनीहरू वरीयताक्रम र ज्येष्ठताका आधारमा नभई कार्यसम्पादन हेरेर बढुवा गरिनुपर्ने भन्दै लबिङमा लागेका हुन् ।
‘राअविबाट नेपाल प्रहरीमा स्थान्तरण भएकाहरू ज्येष्ठता र कार्यसम्पादनका आधारमा एसएसपीका स्वाभाविक दाबेदार छन्, सो टोलीमा बाँकी रहेका र २०५४ सालमा प्रहरी निरीक्षकमा भर्ना भएकाहरू पनि एसएसपीका स्वाभाविक दाबेदार हुन् तर पछिल्ला ब्याचका एसपीहरू पनि शक्तिकेन्द्रबाट बढुवामा छुट्नै नहुने भन्दै दबाब बढाउँदै आइरहेका छन्,’ गृह स्रोतले भन्यो । यो समाचार राजधानी दैनिकवाट साभार गरिएको हो । यो समाचार आजको राजधानी दैनिकमा प्रकाशित छ ।
