काठमाडौँ । म्यानमारको सत्तारुढ पार्टी नेशनल लिग फर डेमोक्रेसीकी नेतृ आङसाङ सुकी पक्राउ परेकी छन् । पार्टी प्रवक्ता म्यो न्यूनका अनुसार सूकीका साथै राष्ट्रपति विन मिन्ट र अन्य नेताहरू पनि पक्राउ परेका छन् । सोमबार बिहानै उनीहरुलाई निवासबाट नियन्त्रणमा लिइएको हो ।
बीबीसीका अनुसार म्यान्मामा जननिर्वाचित सरकार र सैनिकबीच केही समयदेखि तनाव बढिरहेको अबस्थामा सेनाले सत्ता हातमा लिन यो कदम चालिएको हुन सक्ने अनुमान गरिएको छ ।
गत नोभेम्बरमा भएको चुनावमा (एनएलडी) ले सरकार गठनका लागि संसद्मा पर्याप्त हुने गरी सिट जितेको छ । तर सेनाले भने उक्त चुनावमा धाँधली भएको जनाएको छ । सोमवार हुन लागेको संसद्को बैठकलाई पछि सार्न सेनाले सरकारलाई आह्वान गरिरहेको छ ।
