काठमाडौँ, जेठ २४ । नेपालमा कोरोना भाइरस (कोभिड-१९) संक्रमणबाट मृत्यु हुनेको संख्या १३ पुगेको पुष्टि भएको छ । स्वास्थ्य तथा जनसंख्या मन्त्रालयका प्रवक्ता डा. विकास देवकोटाले मन्त्रालयमा हुने नियमित पत्रकार ब्रिफिंगको क्रममा सो कुराको औपचारिक रुपमा पुष्टि गरेका हुन् ।
मन्त्रालयका अनुसार डोल्पा जिल्लाको जगदुल्ला गाउँपालिका-३ का ५८ वर्षीय पुरुषको मृत्यु भएकाे ४ दिनपछि कोरोना भाइरस (कोभिड-१९) संक्रमण पुष्टि भएको छ । जेठ १८ गते नेपालगञ्जबाट डोल्पा पुगेका उनलाई दमको रोगी भएकाले घरमै आइसोलेसनमा राखिएको थियो । होम आइसोलेसनमा भएकै बेला उनको जेठ २१ गते मृत्यु भयो । मृत्युपछि उनको स्वाब संकलन गरी कर्णाली स्वास्थ्य विज्ञान प्रतिष्ठानमा पीसीआर परीक्षणका लागि पठाइएको थियो ।
मन्त्रालयका प्रवक्ता देवकोटाका अनुसार यसैगरी सेती अस्पतालको प्रयोगशालामा गरिएको परीक्षणमा पनि १ महिलामा कोरोना संक्रमण पुष्टि भएको छ। मिर्गौलाकी बिरामी धनगढी ४ की उनको शुक्रबार मृत्यु भएको थियो । डायलासिसकै क्रममा अस्पतालमा मृत्युपछि उनमा कोरोना संक्रमणको आशंकामा पीसीआर जाँच गर्दा नतिजा पोजेटिभ देखिएको थियो ।
नेपालमा आज कोरोना भाइरस (कोभिड-१९) संक्रमण नयाँ ३२३ जनामा पुष्टि भएको छ । योसँगै नेपालमा कोरोना संक्रमितको संख्या ३२३५ पुगेको छ । नेपालमा ७० जिल्लामा कोरोना संक्रमण फैलिसकेको छ । नेपालमा पछिल्लो २४ घण्टामा ३२ जनाले कोरोना भाइरस (कोभिड-१९) जितेसंगै नेपालमा कोरोना भाइरस जित्नेको संख्या ३६५ पुगेको छ ।
आज कोरोना संक्रमणवाट २ जनाको मृत्यु भएको पुष्टि भएसंगै नेपालमा कोराना भाइरस संक्रमणबाट मृत्यु हुनेको संख्या १३ पुगेको हो । यसअघि नेपालमा सिन्धुपाल्चोकमा १ जना, बाँकेमा १ जना, गुल्मीमा १ जना, बारामा १ जना, ललितपुरमा १ जना, अर्घाखाँचीका १ जना, दैलेखका १ जना, बाजुराका १ जना, दोलखाका १ जना, पाल्पाका १ जना र सुर्खेतका १ जना गरी ११ जनाको कोरोना संक्रमणबाट मृत्यु भईसकेको थियो ।
यो पनि पढ्नुहोस्
नेपालमा संक्रमितको संख्या ३२३५ पुग्यो, आज थपिए कोरोनाका नयाँ ३२३ संक्रमित
