१० असार २०८१, सोमबार

बालिकासहित ९ जनाले कोरोना जितेर फर्किए


बुटवल, २५ जेठ । बुटवल उपमहानगरपालिकाले निर्माण गरेको आइसोलेशन सेन्टरमा कोरोना सङ्क्रमण भई आएका नौजना आज एकै दिन कोरोनालाई जितेर फर्किएका छन् ।

बुटवल उपमहानगरपालिका–११ स्थित एन्फा एकेडेमीमा निर्माण गरिएको आइसोलेशन सेन्टरमा विभिन्न चरणमा गरिएको परीक्षणमा उनीहरुमा सङ्क्रमण नेगेटिभ आएपछि आज बिदाइ गरिएको हो ।

कपिवलस्तुको बाणगङ्गा नगरपालिका–४ का अध्यक्ष भीष्मराज भुसाल र आठ वर्षीया बालिकाले कोरोना परास्त गर्दै डिस्चार्ज हुनुभएको छ । सात्विक भोजन, सन्तुलित आहारविहार र उच्च मनोबल पाएपछि कोरोनालाई परास्त गरेको बताउँदै भुसालले समुदायलाई त्रासमुक्त बनाउने कामलाई निरन्तरता दिइने बताउनुभयो । उहाँलाई सङ्क्रमण पुष्टि भएपछि वडा, नगरमा रहेका एम्बुलेन्सले बुटवल ल्याउन नमानेपछि आफैँ स्कुटी चलाएर बुटवल आउनुभएको थियो । “बुटवलमा आउनुअघि केही डर र सामान्य तनाव थियो तर यहाँको वातावरणले सबै तनावमुक्त बनायो”, वडाअध्यक्ष भुसालले भन्नुभयो, “मनोबल उच्च राख्ने र सन्तुलित आहारविहार गर्ने हो भने कोरोना जितिँदोरहेछ ।”

उपमहानगरपालिकाका प्रमुख शिवराज सुवेदीले कोरोना जितेका सबैलाई आज पुष्पगुच्छा प्रदान गर्दै बिदाइ गर्नुभयो । विभिन्न चरणमा गरिएको परीक्षणमा नतिजा नेगेटिभ आएपछि विश्व स्वास्थ्य सङ्गठनको मापदण्डबमोजिम उनीहरुलाई डिस्चार्ज गरिएको नगरप्रमुख सुवेदीले बताउनुभयो । घर फर्किएपछि समुदायमा सचेतनादूतका रुपमा काम गर्न आग्रह गर्दै उहाँले सन्तुलित आहारविहारलाई जारी राख्न आग्रह गर्नुभयो ।

सो अवसरमा प्रमुख प्रशासकीय अधिकृत चक्रपाणि शर्माले आइसोलेशनबाट सङ्क्रमण मुक्त भएर घरमा गए पनि त्यहाँ गएर अपनाउनुपर्ने स्वनियमका बारेमा जानकारी गराउनुभयो । आइतबार डिस्चार्ज हुनेमा कपिलवस्तुका आठ र एकजना रुपन्देहीका रहेका छन् । उनीहरु सङ्क्रमण पोजेटिभ देखिएपछि गत जेठ ११ गते बुटवल–१० स्थित बुटवल आइसोलेशन सेन्टरमा भर्ना हुन आएका थिए । भर्ना भएकामध्ये सातजना भारतबाट फर्किएर आएकाहरु हुन् । उनीहरुमध्ये दुईजनालाई सामान्य ज्वरो देखिए पनि अरू कसैमा पनि कुनै लक्षण नदेखिएको आइसोलेशनमा खटिएका स्वास्थ्यकर्मीले बताएका छन् । दुईजना भने घरमै रहेका बेला सङ्क्रमित भएको भन्दै बुटवलमा आएका थिए । उनीहरुबाहेक अरू सबै जना भारतबाट आएका हुन् ।

आइसोलेशनमा अब ३२ जना रहेका छन् । उनीहरुमध्ये केहीको दोस्रो चरणको परीक्षणमा पनि सङ्क्रमण देखिएपछि अब फेरि अवधि पूरा भएपछि स्वाब सङ्कलन गरेर परीक्षण गरिनेछ । सम्भवतः आइतबार बेलुका नै वा सोमबार स्वाब सङ्कलन गरेर पठाउने गरी तयारी भइरहेको बुटवलका स्वास्थ्य शाखाका प्रमुख कुन्दनकुमार सिंहले जानकारी दिनुभयो । आइसोलेशन सेन्टरमा रहेकालाई नियमित स्वास्थ्य परीक्षण गर्नाका साथै नियमित रुपमा योगा अभ्यास, ध्यान, नृत्य गराउनाका साथै सात्विक भोजन सेवन गराइएको आइसोलेशन सेन्टरको रेखदेखमा खटिएका बुटवलका जनस्वास्थ्य अधिकृत मोहन मिश्रले जानकारी दिनुभयो ।


यो समाचार पढेर तपाईको प्रतिक्रिया के छ ?

प्रतिक्रिया दिनुहोस !