काठमाडौँ, जेठ ११ । नेपालमा उपचारपछि निको भएर डिस्चार्ज भई घर फर्किएसंगै नेपालमा कोरोना भाइरस (कोभिड-१९) जित्नेको संख्या ८७ पुगेको छ । स्वास्थ्य तथा जनसङ्ख्या मन्त्रालयको नियमित पत्रकार सम्मेलनमा प्रवक्ता डा. विकास देवकोटाले सो कुराको जानकारी गराएका छन् ।
शनिबार पुनः संक्रमण देखिएका २ जनासहित ९ जना कोरोनामुक्त भएर वीरगन्जस्थित नारायणी अस्पतालमा उपचाररत उनीहरूलाई साँझ डिस्चार्ज गरिएको हो । पुन: संक्रमित भएर अस्पताल भर्ना हुने २ जना बाहेक अन्य नयाँ ७ जनाले कोरोना भाइरसलाई जितेर घर फर्किन सफल भएका हुन् ।
डिस्चार्ज हुनेमा २ जना पुनः संक्रमण देखिएर अस्पताल भर्ना भएका थिए । जसमा रौतहटका १९ वर्षीय युवक र अर्का भारतीय नागरिक हुन् । निको भएर डिस्चार्ज गरेपनि पुनः संक्रमण देखिएपछि रौतहटका युवकलाई गत बैशाख २० गते र भारतीय नागरिकलाई २१ गते अस्पताल ल्याइएको थियो । आज उनीहरूसँगै बाराका २, पर्साका ३ र रौतहटका २ जना पुरुषहरु पनि डिस्जार्ज भएका थिए ।
साथै रुपन्देहीको बुटवल धागो कारखानामा रहेको आइसोलेसन अस्पतालमा उपचाररत १० जनालाई पनि शनिबार डिस्चार्ज गरिएको थियो । बुटवलको कोरोना विशेष अस्पतालबाट शनिबार एकसाथ घर फर्किने सबै कपिलवस्तुका हुन् । भारतबाट लुकिछिपी गाउँ आएर क्वारेन्टाइनमा बसेका उनीहरूलाई २ साताअघि संक्रमण देखिएपछि कोरोना विशेष अस्पताल ल्याइएको थियो ।
दुईपटक गरिएको स्वाब परीक्षणमा रिपोर्ट नेगेटिभ आएपछि घर पठाइएको लुम्बिनी प्रादेशिक अस्पतालका कोरोना फोकल पर्सन डा. सुदर्शन थापाले हिजो जानकारी दिएका थिए । यसरी हिजो ७ जना र १० जना गरी जम्मा १७ जना अस्पतालवाट डिस्चार्ज भई घर फर्किएसंगै नेपालमा कोरोना भाइरसलाई जितेर घर फर्किनेको संख्या ८७ पुगेको हो । यसअघि जेठ ९ आज एकै पटक २१ जना अस्पतालवाट डिस्चार्ज भई घर फर्किएसंगै नेपालमा कोरोनालाई जितेर घर फर्किनेको संख्या ७० थियो ।
नेपालमा कोरोना संक्रमितको संख्या ६०३ पुगेको छ । जसमध्ये ५२४ जना पुरुषहरु र ७९ जना महिलाहरु रहेका छन् । नेपालमा अहिलेसम्म सिन्धुपाल्चोकमा १ जना र बाँकेमा १ जना र गुल्मीको १ जना गरी ३ जनाको मृत्यु भएको छ । हालसम्म नेपालमा ४२ जिल्लामा कोरोना संक्रमण फैलिसकेको छ भने आज आइतबार पहिलोपटक नुवाकोटमा संक्रमण देखिएको छ ।
यो पनि पढ्नुहोस्
नेपालमा संक्रमितको संख्या ६०३ पुग्यो, आज थपिए कोरोनाका नयाँ १९ संक्रमित
