९ जेठ, काठमाडौं । नेपालमा आज दिउसो कोरोना भाइरस (कोभिड-१९) संक्रमण नयाँ २० जनामा पुष्टि भएको छ । योसँगै नेपालमा कोरोना संक्रमितको संख्या ५०७ पुगेको छ । स्वास्थ्य तथा जनसङ्ख्या मन्त्रालयलको नियमित पत्रकार सम्मेलनमा प्रवक्ता डा. विकास देवकोटाले सो कुराको जानकारी गराएका छन् ।
प्रवक्ता डा. देवकोटाका अनुसार सेती प्रादेशिक अस्पताल, भेरी अस्पतालको प्रयोगशाला गरिएको परीक्षणमा र मोरङको रतुवामाई-२ मा गरी आज फेरि नयाँ २० जनामा कोरोना पुष्टि भएको हो । जस अनुसार कैलाली जिल्लाका ३ जना, डडेलधुराका १ जना, बैतडीका १ जना, बाँकेका १४ जना र मोरङका १ जनामा कोरोना संक्रमण देखिएको हो । डडेलधुरा र बैतडीमा पहिलोपटक संक्रमण देखिएको हो ।
आज दिउसो थपिएकाहरुमध्ये डडेलधुराको पराशुराम-१० का २८ वर्षीय पुरुष १ जना र वैतडीको शिवनाथ-१ का २२ वर्षीय पुरुष १ जनामा कोरोना संक्रमण पुष्टि भएको हो । यस्तै कैलालीमा ३ जनामा संक्रमण पुष्टि भएको छ । जानकी गाउँपालिकाको सरस्वती माविको क्वारेन्टाइनमा रहेका १९, २३ र २६ वर्षीय पुरुषहरुमा संक्रमण पुष्ट भएको हो ।
यस्तै बाँकेमा १४ जना संक्रमित थपिएका छन् । उनीहरु १८ देखि ६१ वर्ष उमेरका पुरुषहरु छन् । उनीहरुमध्ये १८ वर्षीय पुरुष राप्ती सोनारीका हुन् भने बाँकी १३ जना नरैनापुरका हुन् । यस्तै मोरङको रतुवामाई- २ का ४१ वर्षीय १ जना पुरुषमा पनि कोरोना संक्रमण पुष्टि भएको छ ।
यसअघि नेपालमा कोरोना संक्रमितको संख्या ४८७ थियो भने आज दिउसो फेरि २० जना नयाँ कोरोना भेटिएसंगै नेपालमा कोरोना संक्रमितको संख्या ५०७ पुगेको छ । जसमध्ये ४३३ जना पुरुषहरु र ७४ जना महिलाहरु रहेका छन् । नेपालमा कोरोनालाई जितेर अस्पतालवाट डिस्चार्ज भई घर फर्किनेको संख्या ७० पुगेको छ । नेपालमा अहिलेसम्म सिन्धुपाल्चोकमा १ जना र बाँकेमा १ जना र गुल्मीको १ जना गरी ३ जनाको मृत्यु भएको छ ।
यो पनि पढ्नुहोस्
नेपालमा संक्रमितको संख्या ४८७ पुग्यो, आज बिहान थपिए कोरोनाका नयाँ ३० संक्रमित
