काठमाडौँ, जेठ १७ । दैलेखको दुल्लु नगरपालिकामा रहेको क्वारेन्टिनमा मृत्यु भएका युवकको कोरोना भाइरस (कोभिड-१९) को परीक्षण गर्दा रिपोर्ट पोजेटिभ आएको छ। कर्णाली प्रदेशका सामाजिक विकास मन्त्रालयका स्वास्थ्य महाशाखा प्रमुख डा. लक्ष्मी नारायण तिवारीले युवकको नतिजा पोजेटिभ आएको पुष्टि गरेका हुन् ।
तीन दिनअघि युवकको स्वाब परीक्षणको लागि कर्णाली स्वास्थ्य विज्ञान प्रतिष्ठान जुम्लामा पठाइएको थियो । दुल्लु नगरपालिका-११ का ३५ वर्षीय उनको दुल्लु नगरपालिका-७ मा रहेको क्वारेन्टिनमा मृत्यु भएको हो । शनिबार बिहान चिया खाइसकेपछि हिँड्दै गर्दा उनको मृत्यु भएको थियो।
भारतबाट फर्किएका उनी क्वारेन्टिनमा बसेको १० दिन भएको थियो । योसँगै नेपालमा कोरोना भाइरस संक्रमणले मृत्यु हुनेको संख्या ७ पुगेको छ । यसको बारेमा स्वास्थ्य तथा जनसंख्या मन्त्रालयले औपचारिक पुष्टि गर्न भने बाँकी छ ।
यसअघि यसअघि नेपालमा सिन्धुपाल्चोकमा १ जना, बाँकेमा १ जना, गुल्मीमा १ जना, बारामा १ जना, ललितपुरमा १ जना र अर्घाखाँचीका १ जना गरी ६ जनाको कोरोना संक्रमणबाट मृत्यु भईसकेको थियो ।
स्वास्थ्य तथा जनसंख्या मन्त्रालयका अनुसार नेपालमा १४०१ जना कोरोना संक्रमित भएका छन् । पछिल्लो २४ घण्टामा १३ जना अस्पतालवाट डिस्चार्ज भई घर फर्किएसंगै नेपालमा २१९ जनाले कोरोना जितेका छन् । नेपालमा ५३ जिल्लामा कोरोना संक्रमण फैलिसकेको छ ।
यो पनि पढ्नुहोस्
नेपालमा २१९ जनाले जिते कोरोना, थप १३ जना घर फर्किए
नेपालमा संक्रमितको संख्या १४०१ पुग्यो, आज थपिए कोरोनाका नयाँ १८९ संक्रमित
