पोखरा । गण्डकी प्रदेशका मुख्यमन्त्री कृष्णचन्द्र नेपाली पोखरेलले आज शुक्रबार प्रदेशसभामा विश्वासको मत लिंदैछन् । नेपाली सेनाको हेलिकप्टर चढेर बिहीबार मनाङको बाढी पहिरो प्रभावित क्षेत्रमा पुगेका गण्डकी प्रदेशका मुख्यमन्त्री कृष्णचन्द्र नेपाली पोखरेल आज शुक्रबार बिहान पोखरा फर्किएका छन् ।
स्रोतका अनुसार विश्वासको मत लिन प्रदेशसभाको बैठक बिहान ११ बजे बोलाइएको छ । मनाङ घर भएका मन्त्री दीपक मनाङे, सांसद चिन्त घलेसँगै राहत सामाग्रीसहित स्थलगत निरिक्षणका लागि पुगेका मुख्यन्त्री पोखरेल हेलिकप्टर उड्न नसक्दा बिहीबार उतै रोकिएका थिए ।
मुख्यमन्त्री चढेर मनाङ पुगेको सेनाको हेलिकप्टर उद्धारमा लागि मनाङमै रोकिएपछि मुख्यमन्त्री अर्को हेलिकप्टर मगाएर फर्किने योजनामा थिए । पोखराबाट गएको हेलिकप्टर मौसमका कारण ल्याण्ड गर्न नसकी बिहीबार पोखरा नै फर्किएको थियो ।
जेठ २९ गते शनिबार मुख्यमन्त्री नियुक्त भएका पोखरेलले एक हप्तापछि आज विश्वासको मत लिन लागेका हुन् । नेपालको संविधानमा मुख्यमन्त्रीले शपथ लिएको ३० दिनभित्र प्रदेशसभामा विश्वासको मत लिनुपर्ने व्यवस्था छ ।
विश्वासको मत नलिइकन सरकारले महत्वपूर्ण कार्यहरु गर्दा प्रश्न समेत उठ्ने भएकाले उनले विश्वासको मत लिने लागेका हुन् । विश्वासको मत लिन २ दिन अघि प्रदेशसभामा जानकारी गराउनुपने प्रावधानअनुसार उनले प्रदेशसभा सचिवालयलाई लिखित जानकारी गराएका थिए ।
११ मन्त्रालय भएको प्रदेशमा मुख्यमन्त्री नियुक्त भएको दिन पोखरेलले ४ जनालाई मन्त्री नियुक्त गरेर शपथ लिएका उनले बाँकी मन्त्रालयमा विश्वासको मत लिएपछि मात्रै मन्त्री नियुक्त गर्ने तयारी गरेका छन् ।
विश्वासको मत प्राप्त गर्न ३० मत आवश्यक पर्छ । सत्तारुढ गठबन्धनमा कांग्रेसका १५, माओवादीका ११, जनमोर्चा र जनता समाजवादीका २/२ र एक स्वतन्त्र सांसदको साथ छ ।
राष्ट्रिय जनमोर्चाका कृष्ण थापाको पद सर्वोच्चले खारेज गरेपछि गण्डकी प्रदेशसभामा कूल ५९ सदस्य रहेकामा विश्वासको मतका लागि ३० सदस्यको समर्थन आवश्यक पर्दछ । सत्तारुढ गठबन्धनमा कांग्रेसका १५ जना, माओवादीका ११ जना, जनमोर्चा र जनता समाजवादीका २/२ जना र १ जना स्वतन्त्र सांसद गरी ३१ जनाको समर्थन मुख्यमन्त्री पोखरेललाई रहेको छ ।
तत्कालिन मुख्यमन्त्री पृथ्वीसुब्बा गुरुङले चलखेल गरेर २ जना प्रदेशसभा सदस्यले पोखरेललाई दिएको समर्थन नगरेमा पोखरेलको सरकार ढल्ने देखिन्छ भने बिपक्षी दल एमालेको पनि बहुमत नपुग्ने भएकोले प्रदेशसभा नै विघटन गरेर निर्वाचनमा जानुपर्ने हुन्छ ।
तसर्थ ‘रात गए अग्राठ पलाउछ’ भन्ने चिन्ताले मौका आउँछ पर्खदैन भनेझैँ आइरन तातेकै बेला कपडामा लगाउनुपर्ने भएकोले उनले विश्वासको मत लिन हतार गरेको देखिन्छ । पोखरेलले विश्वासको मत प्राप्त गर्न नसके संवैधानिक व्यवस्था अनुसार प्रदेशसभा भंग गरी ६ महिनाभित्र निर्वाचन गर्नुपर्ने हुन्छ ।
