कञ्चनपुरकी १३ वर्षीया किशोरी निर्मला पन्तको बलात्कारपछि हत्या भएको आज चार महिना भईसक्दा पनि सरकारले बलात्कार पत्ता लगाउन सकेको छैन । न्यायको लागि उनका बुवा यज्ञराज पन्त र आमा दुर्गादेवी पन्त धर्ना बसेका थिए । त्यहि धर्ना र छोरीको न्यायको भिख माग्ने क्रममा उनका बुबा पन्तको मानसिक सन्तुलन गुमेको संकेत देखिएको छ ।
मानसिक सन्तुलन गुमेको संकेत देखिएपछि उनलाई उपचारको लागि काठमाडौंको त्रिवि शिक्षण अस्पतालमा भर्ना गरिएको छ । उनलाई उपचारको लागि विमानबाट ल्याउने तयारी गरिएपनि विमान कम्पनीले पन्तलाई ल्याउन नमानेपछि उनलाई गाडीमा ल्याइएको थियो । महेन्द्रनगरबाट धनगढी ल्याउँदासम्म पन्तले गाडीमा एकोहोरो बोल्ने छटपटाउने गरेका कारण समस्या भएपछि उनलाई लठ्याउने सुई लगाएर काठमाडौं ल्याइएको थियो । कंचनपुरबाट शिक्षण अस्पताल ल्याई पुर्याउदा उनको खुट्टा समेत फ्याक्चर भएको छ । बाटोमा धेरै बर्बराउने र उफ्रिने गर्दा उनको खुट्टामा पनि समस्या भएको हो । एक्सरेको रिपोर्टमा पन्तको खुट्टा फ्याक्चर भएको देखिएको छ ।
शिक्षण अस्पताल ल्याइएका पन्तलाई आकस्मिक कक्षमा राखेर उपचार प्रक्रिया अगाडि बढाइएको छ । उनको उपचारमा डा. तीर्थमान श्रेष्ठ नेतृत्वको मेडिकल टिम खटिएको छ । उनलाई अस्पताल कै मानसिक वार्डमा भर्ना गरेर उपचार सुरु गरिएको छ । बाटोमा हुन सक्ने सम्भावित घटनालाई मध्यनजर गर्दै प्रशासनले तीन जना सुरक्षाकर्मी समेत पठाएको थियो । छोरी निर्मलाको हत्या भएको ४ महिना पुग्दासमेत अपराधी पत्ता लगाउन नसकेको भन्दै यज्ञराजले सरकारलाई अनुसन्धानमा दबाव दिन परिवारसहित धर्नामा बसेका थिए ।
यतिमात्र नभईकन निर्मला पन्तका बुबा यज्ञराज पन्त र आमा दुर्गादेवी पन्त आफ्नो छोरीको न्यायको लागि काठमाडौंसम्म भौतारिदै आएका थिए । प्रधानमन्त्री केपी शर्मा ओलीदेखि गृहमन्त्री रामवहादुर थापा वादलसँग पनि न्यायको भिख माग्दै भेट गरेका थिए । भेटघाटमा हत्यारा चाडोभन्दा पत्ता लाग्ने छ र न्याय पाउने छ भन्दै आशा दिलाएका थिए । तर चार महिना बितिसक्दा पनि अहिले सम्म हत्यारा पत्ता लगाउन सकेको छैन । हत्याको छानविनका विशिष्ट समितिहरुलाई निलम्वन गरेर पनि नँया समितिलाई खटाएका थिए । तर खास हत्यारा को हो भन्ने अहिलेसम्म पत्ता लगाउन सकेका छैनन् ।
निर्मला पन्तको हत्याबारे अनुसन्धानमा संलग्न जिल्ला प्रहरी कार्यालय कञ्चनपुरमा कार्यरत प्रहरी नायब निरीक्षक हरसिंह धामी र प्रहरी जवान चाँदनी साउदलाई निलम्वन गरिसको छ । प्रहरी प्रधान कार्यालयले निर्मला पन्तको हत्याबारे छानविन समितिको सिफारिशमा घटनास्थल अनुसन्धान अधिकृतका रुपमा धामी र साउदलाई खटाएको थियो । प्रहरी प्रवक्ता एवं प्रहरी वरिष्ठ उपरीक्षक शैलेश थापा क्षेत्रीले अनुसन्धानका क्रममा गम्भीर लापरवाही गरेको पाइएकाले धामी र साउदलाई गत असोज २२ निलम्वन गर्नुभएको थियो ।
आफ्नो छोरीको बलात्कार पछि हत्या गरिएको हत्यारालाई सजाय माग्दै चार महिनादेखि तड्पिरहेका निर्मलाका बुवा अहिले आएर मानसिक सन्तुलनसम्म गुम्ने संकेत देखिएको छ । तर पनि सरकार मौन देखिन्छ । तीन तहको सरकार भइसकेको छ । त्यसमाथि वाम गठवन्धनको सरकार छ । सात वटा प्रदेश मध्ये छ वटा प्रदेशमा पनि वाम गठवन्धनकै सरकार रहेको छ । बाकी एउटा प्रदेश नम्बर दुई संघिय समाजवादी फोरम र राजपा मिलेर सरकार चलाएको छ । यसरी प्रदेश-प्रदेशमै सरकार भएपनि निर्मला पन्तको हत्यारा पत्ता लगाउन सकेको छैन । निर्मला जस्ता लाखौं युवतीहरु बलात्कारको सिकार भएका छन् । तर यो वाम गठवन्धनको सरकारले केहि गर्न सकेका छैनन् । के यस्ता घट्नाहरुलाई न्यूनीकरण गर्न त ? बलात्कार र हत्यारा पत्ता लगाउनसम्म सकिरहेको छैन, आखिर किन ? वाम गठवन्धनको सरकार जनताको पक्षमा काम गर्न सकेनन् । किन जनताको मर्न बुझेनन् ?
एउटा बालिकामाथि जघन्य जस्ता अपराध भएको चार/चार महिना भइसकेको छ । आफ्नो छोरीको न्याय मागेका निर्मलाका बुवाको मानसिक सन्तुलन गुमिसकेको संकेत देखिन्छ । तर यो सरकार अझै मौन देखिन्छ । केहि गर्न सकिरहेको छैन । एउटा नारीमाथि भएको बलात्कार को हो भन्ने पत्तासम्म लगाउन नसक्ने यो सरकारले के जनता र देशको विकासका लागि काम गर्ला भनेर विश्वास गरुम ?
अहिलेको समयमा हेर्ने हो भने, निर्मला पन्त मात्र नभई विभिन्न क्षेत्रका समाजका नारीहरु दिनानुदिन बलात्कृत, हत्या भएका छन् । अहिले सबै नारीहरु असुरक्षित छन् । निर्मला पन्त जस्ता अन्य बालबालिकदेखि वृद्धासम्म बलात्कृत भएका छन् । आखिर किन यस्तो घटना हुन्छ ? किन न्यूनीकरण गर्न सकिरहेको छैन ? नेपाल सरकारले के अव सबै नारीहरु सधै यसरीनै बलात्कारको सिकार बनाइराख्ने होकी के हो ?
नेपालको राष्ट्रपति पदमा महिला भएर पनि अहिले एउटा महिला बलात्कृत हुँदासम्म कुनै खालको चासो देखाएको देखिदैनन् । एउटा नारीमाथि हुने अन्याय, अत्याचार नारीले बुझ्दैनन् भने कसले बुझ्लान त । दिनानुदिन बालबालिकहरु बलात्कृत भएका छन् । निर्मला पन्तको हत्यारालाई अहिले चार महिना वितिसक्दा पनि पत्ता लगाउन सकेको छैन ।
एउटा बुवाले आफ्नो छोरीको न्यायको लागि भिख माग्दै भौतारी रहँदा मानसिक सन्तुलन गुमाउने अवस्थासम्म पुर्याई दिएको छ । नेपाल सरकारले एउटा नारीको हत्यारालाई पत्ता लगाएर सजाय र पिडितलाई न्याय दिनुपर्ने ठाउँमा उल्टै मानसिक सन्तुलन गुमाउने अवस्थासम्म पुर्याई दिएको छ । आखिर किन यो सरकार अतिधेरै मौन छ ?
नारी भनेको आमा हुन् । नारीको रक्षा गर्न सिक्नुपर्छ । हामी सबै मानिसहरु नारीको कोखवाट यो धर्तीमा जन्मिएको हो । त्यसैले गर्दा नारीलाई सम्मान गर्नुपर्छ । यस्ता घटनाहरुलाई न्यूनीकरण गर्नको लागि सबै व्यक्तिहरु शिक्षित हुनुपर्छ । सबै पुरुषहरुमा नारीलाई सम्मान गर्नुपर्छ भन्ने भावना हुनुपर्दछ । निर्मलाको बुवालाई मानसिक सन्तुलन गुमाउने अवस्थासम्म पुर्याउने होइन । हौसलाका साथ नेपाल सरकारले न्याय दिनुपर्दछ । बलात्कार, हिंसा जस्ता घटनालाई न्यूनीकरणको लागि सरकारले पनि संविधानमा लेखिएका कानुनहरुलाई व्यवहारमा उतार्नु पर्दछ । हत्यालाई चाडोभन्दा चाडो कानुनी कारवाही गरि पिडितलाई न्याय दिलाउनु पर्दछ । अनि मात्र निर्मला पन्त जस्ता अन्य महिलाहरुले न्याय पाउने छन् ।
*राम मगर नेपालपत्रका समाचार सम्पादक हुन् । उनी राजनीतिक, सामाजिक तथा स्वास्थ्यको विषयमा कलम चलाउछन् ।
यो पनि पढ्नुहोस्
