काठमाडौं । सरकारले संसदमा प्रस्तुत गरेको नीति तथा कार्यक्रम माथि उठेका प्रश्नमा प्रधानमन्त्री बालेन शाहले जवाफ नदिने भएका छन् । उनको सट्टा अर्थमन्त्री डा. स्वर्णिम वाग्लेले जवाफ दिने हुन् ।
यसअघि प्रधानमन्त्री बालेनले जवाफ दिने सम्भावित कार्यसूची संसद सचिवालयले जारी गरेको थियो । तर, प्रधानमन्त्री शाहले जवाफ नदिने भएपछि अर्थमन्त्री वाग्लेले दिने भएका हुन् ।
राष्ट्रपति रामचन्द्र पौडेलले आर्थिक वर्ष २०८३/८४ को सरकारको नीति तथा कार्यक्रम यही वैशाख २८ गते संघीय संसद्मा पेस गरेका थिए । नीति तथा कार्यक्रममाथिको प्रश्नमा प्रधानमन्त्रीले जवाफ दिने प्रचलन छ । तर प्रधानमन्त्री बालेन शाहले आज जवाफ नदिने भएकाले अर्थमन्त्री डा. वाग्लेले नै जवाफ दिने तयारी छ ।
प्रतिनिधि सभाको बैठक विहान ११ बजेका लागि बोलाइएको छ । त्यसमाथि आज छलफल प्रारम्भ गर्ने, छलफलमा उठेका प्रश्नको जवाफ दिने, सांसदहरुबाट प्राप्त संशोधनलाई निर्णयार्थ प्रस्तुत गर्ने र आजै पारित गर्ने तयारी गरिएको संसद सचिवालयले जनाएको छ । हिजोको बैठकमा दलका नेताहरुले सम्बोधन गरेका थिए ।
