काठमाडौं । सर्वोच्च अदालतले हिजो हेर्दाहेर्दैमा राखेको क्रिकेटर सन्दीप लामिछानेको मुद्दामा आज पनि सुनुवाइ हुने भएको छ ।
हिजो आइतबार सरकारी वकिल र पीडितका वकिलको बहस सकिएतापनि सन्दीपका वकिलको बहस नसकिएपछि आज सोमबार पनि सुनुवाई हुने भएको हो ।
सर्वोच्चका न्यायाधीश सपना मल्ल प्रधान र कुमार चुडालको इजलासले उक्त मुद्दाको सुनुवाइ हिजो बन्द इजलास गरेको थियो । लामिछानेसँग सम्वन्धित दुई रिटको आज सर्वोच्चमा सुनुवाइ बन्द इजलासमा भएको थियो ।
लामिछाने विदेश जान पाउने वा नपाउने भन्ने टुंगो आज मात्र लाग्ने भएको हो । लामिछानेले आफूलाई विदेश जान अनुमति दिनुपर्नेलगायत माग गर्दै दिएको निवेदन र लामिछानेलाई थुनामा राखेर अनुसन्धान गर्नुपर्ने भन्ने दुवै रिटमाथि सर्वोच्चमा हिजो सुनुवाइ भएको थियो ।
यसअघि शुक्रबार सर्वोच्चले लामिछानेलाई विदेश भ्रमणमा जाने अनुमति दिएको थिएन । जिल्ला अदालत काठमाडौंले थुनामा पठाएका लामिछानेलाई उच्च अदालतले २० लाख रुपैयाँ धरौटीमा रिहा गर्न आदेश दिएको थियो ।
धरौटी बुझाएर खेलमा फर्किएका सन्दीप राष्ट्रिय टिममा फर्किएतापनि उच्च अदालतले विदेश जान भने प्रतिबन्ध लगाउने आदेश दिएपछि उनी सर्वोच्च अदालत गएका थिए ।
