काठमाडौं । क्रिकेटर सन्दीप लामिछाने रिट निवेदन न्यायाधीश सपना प्रधान मल्ल र कुमार चुडालको इजलासमा परेको छ । लामिछानेसँग सम्वन्धित दुई रिटको आज सर्वोच्च अदालतमा न्यायाधीश मल्ल र चुडालको इजलासमा सुनुवाइ हुने भएको हो ।
लामिछाने विदेश जान पाउने वा नपाउने भन्ने टुंगो आज लाग्ने भएको छ । लामिछानेले आफूलाई विदेश जान अनुमति दिनुपर्नेलगायत माग गर्दै दिएको निवेदन र लामिछानेलाई थुनामा राखेर अनुसन्धान गर्नुपर्ने भन्ने दुवै रिटमाथि सर्वोच्चमा आज सुनुवाइ हुन् लागेको हो ।
यसअघि शुक्रबार सर्वोच्चले लामिछानेलाई विदेश भ्रमणमा जाने अनुमति दिएको थिएन । सर्वोच्चको यो आदेशसंगै लामिछाने राष्ट्रिय टिममा रहेर यूएइ भ्रमणमा जान पाएका थिएनन् ।
क्रिकेट खेल्न यूएई जान पाउनुपर्ने मागसहित सर्वोच्चमा लामिछानेले दायर गरेको मुद्दाको न्यायाधीश ईश्वरप्रसाद खतिवडाको एकल इजलासमा सुनुवाइ भएको थियो । सर्वोच्चका न्यायाधीश खतिवडाको इजलासले अर्को मुद्दालाई पनि साथमा राखेर आज आइतबार नै पेश गर्न आदेश पनि दिएको थियो ।
उच्च अदालत पाटनले सन्दीपलाई विदेश जान प्रतिबन्ध लगाएपछि उनले सर्वोच्चमा निवेदन दिएका थिए । नाबालिग बलात्कारको कसुरमा काठमाडौँ जिल्ला अदालतमा विचाराधीन मुद्दा रहेका लामिछाने बिहीबार सर्वोच्च अदालत पुगेका थिए ।
जिल्ला अदालत काठमाडौंले थुनामा पठाएका लामिछानेलाई उच्च अदालतले २० लाख रुपैयाँ धरौटीमा रिहा गर्न आदेश दिएको थियो । धरौटी बुझाएर खेलमा फर्किएका सन्दीप राष्ट्रिय टिममा फर्किएतापनि उच्च अदालतले विदेश जान भने प्रतिबन्ध लगाउने आदेश दिएपछि उनी सर्वोच्च अदालत गएका थिए ।
लामिछानेलाई धरौटीमा छाडेको ठीक छ कि पुनः थुनामै फर्काउनुपर्ने हो भन्ने विषयमा आज सर्वाेच्चमा सुनुवाइ हुने भएको हो । उच्च अदालत पाटनको फैसला बदर गरेको खण्डमा सर्वाेच्चले सन्दीपलाई पुनः थुनामै पठाउन पनि सक्ने छ । सुनुवाईका लागि अग्राधिकारसमेत प्रदान गरी आज संयुक्त इजलासमा पेस गर्न आदेश दिइएको हो ।
यो पनि पढ्नुहोस्
