फाइल फोटो
१२ वैशाख, काठमाडौं । प्रधानमन्त्री केपी शर्मा ओलीले प्रतिपक्षी दलका नेता तथा पूर्वप्रधानमन्त्री शेरबहादुर देउवालाई प्रधानमन्त्री निवास बालुवाटारमा बोलाएका छन् । प्रधानमन्त्री ओली र देउवाको आज हुने भेटघाट फिर्ता लिईसकेको अध्यादेशकै विषयमा केन्द्रित हुने बुझिएको छ ।
संवैधानिक परिषद्मा प्रतिपक्षी दलको नेताको भूमिका खोसेपछि प्रधानमन्त्रीसँग देउवा लगायत विपक्षी नेताहरु रुष्ट थिए । तर प्रधानमन्त्रीले आफ्नै ग्राण्ड डिजाइनबाट पछि हट्दै अध्यादेश फिर्ता लिई राष्ट्रपति समक्ष पनि सिफारिस गरिसकेका छन् ।
नेपाल सरकारले चौतर्फी विरोध भएपछि विवादित दुबै अध्यादेश फिर्ता लिने निर्णय गरेको छ । आज शुक्रबार प्रधानमन्त्री निवास बालुवाटारमा बसेको मन्त्रिपरिषद्को बैठक राजनीतिक दल र संवैधानिक परिषदसम्बन्धी अध्यादेश फिर्ता लिने निर्णय गरेको हो ।
मुख्यत: दल विभाजन सम्बन्धी अध्यादेशको विपक्षमा आफ्नो पार्टी नेकपाका बहुमत सदस्य उभिएपछि र बाहिर समेत चर्को विरोध भई फिर्ता लिन दबाब परिरहेका बेला विवादित अध्यादेशबारे छलफल गर्न प्रधानमन्त्री ओलीले आज आकस्मिक रुपमा मन्त्रीपरिषद्को बैठक बोलाएका थिए ।
सरकारले यही वैशाख ८ गते राजनीतिक दल सम्बन्धी र संवैधानिक परिषद सम्बन्धी अध्यादेश जारी गरेको थियो । पार्टी फुटाउन केन्द्रीय समिति वा संसदीय दलमा ४० प्रतिशत भए पुग्ने र प्रतिपक्षी दलको नेताविना संवैधानिक परिषद्को बैठक बस्ने अध्यादेशको नेकपाभित्रै र बाहिर पनि विरोध भइरहेको छ ।
यो पनि पढ्नुहोस्
दुबै विवादित अध्यादेश फिर्ता लिने सरकारको निर्णय
प्रधानमन्त्रीले बोलाए आकस्मिक मन्त्रिपरिषद् बैठक, विवादित अध्यादेशबारे छलफल हुने
