काठमाडौं । राष्ट्रिय स्वतन्त्र पार्टीका सभापति एवं पूर्व गृहमन्त्री रवि लामिछानेविरुद्ध राहदानी दूरुपयोगको कसुरमा कारबाही गर्न माग गर्दै सर्वोच्च अदालतमा दायर भएको रिट दर्ता भएको छ ।
सिन्धुलीका युवराज पौडैल ‘सफल’ लामिछानेविरुद्ध राहदानी दुरुपयोग मुद्धामा अनुसन्धान गर्नुपर्ने मागसहित हिजो सर्वोच्च पुगेका थिए । सर्वोच्च अदालत प्रशासनले उक्त रिटमाथि अध्ययन गरेर आज दर्ता गरेको हो । उक्त रिटको पेसी भोलि मंगलबारका लागि तोकिएको छ ।
अमेरिकी नागरिक नै रहेको अवस्था नेपालको राहदानी लिएको विषयमा लामिछानेमाथि मुद्दा दायर गर्न माग गर्दै पौडेल सर्वोच्चमा रिट दायर गरेका हुन् । लामिछाने उपर कानुन बमोजिम छानबिन गरी मुद्दा दायर गर्नु भन्दै विपक्षीहरूका नाममा परमादेश जारी गर्नुपर्ने युवराजको माग रहेको छ ।
रिटमा लामिछानेविरुद्ध राहदानीका विषयमा मुद्दा नचल्ने भनी गत चैत ६ गते महान्यायाधिवक्ता दिनमणि पोखरेलले गरेको निर्णय कार्यान्वयनमा रोक लगाउन माग गरिएको छ ।
